Биз кайзаманда да ногай халкымыздынъ ийги аьдетлерин саклаймыз, оларды несилден-несилге коьширемиз.

Бизим кишкей Аталыгымыз Россиядынъ, Дагестан Республикасынынъ маьнели кесеклерининъ бириси болып, олар ман биргелесип, оьз аьрекетин элимиздинъ оьрленуьвине, онъайлыгына каратады. Янъыларда Кизляр каласында шатлыклы аьлде Дагестан Республикасынынъ Конституциясынынъ куьнине багысланып, шара оьтти. Байрамда районымызда яшайтаган баьри халкларынынъ ваькиллери де катнастылар, аьр бир халк оьз маданиятынынъ, яшав-турмысынынъ, аьдетлерининъ майданын курды. Биз де бу байрамда шетте калмай, Кизляр районынынъ ети авылыннан ямагат аьрекетшилери болып, майдан аьзирледик. Ногай кийимлер кийип, халкымыздынъ туьрли асларын асып, терме салып, оьз маданиятымызды коьрсеттик. Куьрлеме асылды, сорпа кайнаттылар, бир койдан плов асылды, туьрли таьтлиликлер, катлама писирилди. Бизим майданнынъ касында халк коьп эди, сол бизди бек суьйинтти. Конъысы Сары-Су авылыннан маданият уьйининъ директоры Амирхан Тилеков концерт программасы ман келип, конаклардынъ коьнъилин коьтерди, онынъ тербияланувшылары биювлер коьрсеттилер, ол оьзи домбырада, кобызда анъ шалып, бир неше йырлар йырлады. Тоьрешилерден туьзилген комиссия баьри майданларды да айланып шыкты, олардынъ биреви де белгиленмей калмады, ийгилерди айырым дипломлар ман белгиледилер. Бизим халкымыздынъ майданы коьрсетуьвлерге коьре, тоьрешилер мен энъ де ийги деп айтылды. Ногайлардынъ маданиятына, аьдетлерине сондай уьйкен баа берилгени баьримизге де уьйкен суьйиниш. Байрам бек ийги болып оьтти. Меним ше, сондай йолыгыслар, байрамлар бизим халкымызды бирлестиредилер. И.Бигишиев, ДР аз санлы тамырлы ногай халкынынъ общиналар Ассоциациясынынъ президенти.

Суьвретте: И.Бигишиев эм А.Тилеков.