Терекли-Мектеб район орталыгында ярык байрам – Ана куьни белгиленди. Онда коьп балалы аналар, солай ок республикалык эм район организациялар етекшилери шакырылдылар.
Авылдынъ эрлери атыннан кыскаяклыларга каратылган кутлав соьзи мен авыл аькимбасы Зейдулла Аджибайрамов шыгып соьйледи. Ол Ана куьни бизге энъ ювык эм юреклерге энъ аьзиз аьдемимиз – анага багысланган байрам энъ йылы шатлык куьни экенин белгиледи.
– Анадынъ уллы суьйими бизди бесик заманымыздан алып йылытады, яшав авырлыгыннан оьтпеге ярдамласады, уьстинликке ынанымды арттырады. Эм биз неше ясымызда экени маьнели тувыл: анадынъ йылы соьзи, юмсак карасы, акыллы маслагатлары балага да, ясы уьйкенге де керек. Уллы ана кыйыны дайым да оьрметли эм маьнели. Ана куьнин байрамшылав – ога онынъ суьйимлиги эм анъламлыгы уьшин оьз разылыгымызды билдирмеге ийги эп. Айырым разылык соьзлеримди каратаман баьтир-аналарга, коьп балалы аналарга, етим эм каравсыз ялгызлыкта калган саьбийлерди саклаган аналарга.
Аявлы аналар! Ак юректен сизге разылыкка, суьйимликке эм сый-оьрметликке толган соьзлеримди каратаман. Сизинъ арымастай кыйынынъыз, межесиз шыдамлыгынъыз, ян тоьринъиздинъ кенълиги эм йылувлыгынъыз уьшин алдынъызда басты иемен. Сизинъ коьзлеринъизде дайым да суьйиниш саьвлелери болсын. Ак юректен сизге берк ден савлыкты, аьел онъайлыгын, бир-биринъиз ара анълавлыкты, балаларынъыз ягыннан йылувлыкты йорайман, – деди ол йыйылганлар алдында.
Солай ок кутлав соьзлери мен авыл Депутатлар Йыйынынынъ председатели Адильбек Валиев, Терекли-Мектеб Ясуьйкенлер советининъ председатели Шатемир Мунгишиев, районнынъ Хатын-кызлар советининъ председатели Асият Манкаева, мировой судья Асият Саитова, Ногай орманлык хозяйствосынынъ директоры Феруза Дикинова, Ногай районында Пенсионлык фонд боьлигининъ етекшиси Мадина Абдулалимова эм коьплеген баскалар шыгып соьйледилер.
Байрам шатлыгы йылы аьлде оьтти. ДР ат казанган маданият куллыкшысы Бегали Куруптурсунов пан бирге ана акында йырлар йырландылар. Авыл аькимбасы Ногай районында Россельхозбанк боьлигининъ етекшиси Абдурахман Койлубаев атыннан баьри кыскаяклыларга шешекейлер байламларын савкатлады. Коьп балалы аналарга багысланып Халк яратувшылык орталыгында байрам концерти де болып озды.
Э.Кожаева.
Суьвретте: байрам шатлыгында.
