Янъыларда район балалар китапханасында Балалар китабининъ юмалыгынынъ ашылувына багысланган «Тувган куьнинъ мен, китап» деп аталып, бек кызыклы шара оьтти. Балалар байрамын китапхана куллыкшылары Зарема Джумалиева ман Келдихан Саллыбаева юриттилер.

Олар быйыл тувганлы 140 йыл болган балалар язувшысы Корней Чуковскийдинъ яратувшылыгы бойынша «Эртегилердинъ аьлемет дуныясы» деген адабиат ойынын саьбийлерге уйгынладылар. Адабиат ойынында Кадрия атындагы мектебининъ окытувшылары Нурбике Кельдасова ман Кайтархан Кокшеевадынъ 3-5-нши классларынынъ окувшылары катнастылар. Балалар К.Чуковскийдинъ эртегилери бойынша соравларга явап бердилер, юмаклар шештилер, язувшыдынъ «Айболит», «Мойдодыр», «Муха-цокотуха» ятлавларын яттан айттылар. Юмалыктынъ экинши куьнинде А.Толстой тувганлы 140 йыл болувына «Алтын ашкышын излеп» деп аталган адабиат окувлар оздылар. Эртегиси куьн С.Михалков эм С.Маршактынъ китаплери бойынша «Биз ятлавларды татым окыймыз» деген поэзия саьати оьтти. Доьртинши куьн балалар кызыклы «Периодика планетасы» ойын-кыдырувда катнастылар. Балалар китабининъ юмалыгында дагестан язувшыларынынъ яратувшылыгына да эс этилинмей калмады. Соьйтип, «Дагестан язувшыларынынъ яратувшылыгы бойынша суьйикли ятлавлар» деген шаирлик коьнъилининъ саьати уйгынланды. Балалар китабининъ юмалыгынынъ ябылувына багысланган шарада сырагылар келтирилдилер, балаларга савкатлар тапшырылды. Энъ де ийги дослар – китаплерге балаларда суьйимди тербиялавга багысланган шаралар саьбийлер уьшин бек пайдалы болды.
Н.Кожаева.
Суьвретте: шара катнасувшылары.