Буьгуьнлерде Ногай районынынъ коьплеген яслары ман бирге Шумлелик авылдынъ яс яшавшылары да Украинады денацификация эм демилитаризация этуьв бойынша юритилетаган согыс спецоперациясында белсенли ортакшылык этедилер.
Курбан Курбанов Шумлелик авылында тувып-оьскен. Онынъ ата-анасы да мунда тувганлар эм сав яшав оьмирин бу авыл еринде оьткерип келедилер. Сол себептен Ногай шоьллиги оьзининъ тынык рахатлы, ама бирерде каты табиат аьллери мен буьгуьнги Курбановлардынъ да ата юрты болады.
Шумлелик авылдынъ орта мектебин окып кутарган сонъ, Курбан Кизлярдагы медресеге окувга туьседи. Болса да, ясты юреги аьр дайым да аьскершилик куллыгына тартып турган, эм ол, дин окув ошагында бир йыл окып биткен сонъ, Россия Аьскер сырасына кетеди. Басында Алыс Куьнтуварда сепер борышын куьтеди. Мунда Курбан аьскер боьлиги мен контракт бойынша куллык этуьвге келисуьв туьзеди. Соьйтип, 3 йыл куллык эткеннен сонъ, тагы да 3 йылга контрактын созады. Ол аьр заманда оьзининъ кардаш-тувганларына, танысларына эм досларына армия онынъ юрек шакырувы эм бактысы экенин айтып турган.
Былтыр ноябрь айында Курбан отпуск алады эм тувган авылына келип кетеди.
– Бас деп мен оны танымай да калдым, – деп эскереди Шумлелик мектебининъ директоры, Ногай район йыйынынынъ депутаты Омаргаджи Шахбанов. – Ол ызгы йыллар ишинде соьйтип те оьсип, беркип, шынты эр йигит болыпты эди. Курбан уьйленмеге, той этпеге суьйимлиги барлыгын билдирди, ога кардаш-ювыклары бир аьруьв куллыксуьер кыз да тавыпты экен. Тек ол заман ким билген эди ястынъ сондай тынышлы эм ийги ой-ниетлери толмай калаягын…
Омаргаджи кесек заманга соьзин боьледи, авыр куьрсинип, карасын шетке бурады. Мага коьре, сол шакта онынъ коьз алдында оьзининъ туьнегуьнги окувшысы-выпускниги коьринип кеткен болар. Арада бир мектеб танапыслары арасында ол онынъ кеделерге келисли ланъкасын коьрип, ога коьрсетуьвлер эткенин, онынъ баскага коьмекке аьзирлигин, юрек тазалыгын сезип, мактаганын эм аьр куьнде де ийги окымага, неге десе билим каранъада яркыраган шырак кимик аьдемди оьрленуьвге алып баратаганын айтканын эсине туьсиргендир.
Быйыл Курбан тагы да отпускка шыгады, болса да соны ол оьзи контракт бойынша зенитно-ракеталы аьскер сырасында куллык этетаган Сахалинде оьткереди. Май айында оны эндигиси Украина еринде специальли согыс операциясында катнасатаган баска аьскер боьлигине коьшируьв акында буйырык шыгады. Соны ман ясты аьрекетлеп танктынъ механик-водители кесписине уьйретедилер. Соьйтип Курбан уьшин эндигиси шынты согыс куьнлери басланады.
Дав деген аявсыз каты экени аьр кимге де белгили, ама сонынъ анъсыздан эм анъламастан кимге кайдай «савга» аьзирлеп койганын эш кимге де билуьв кыйынлы. Бир куьнлердинъ бирисинде бизим аьскершилер мен яв аьскерлери ювыкласатаган линияда Курбаннынъ танкын атып ягадылар. Сол ок аьсерде, санавлы секундалардан болар, ялын-от пан янып баслаган машинага душпаннынъ ракетасы тувра келип туьседи… Омаргаджи Шахбановтынъ айтувы ман, бу согыс сценасы видеога согылып алынган болган экен, соны сонъында ол оьзи де карап шыккан.
Танкка ракета келип урынган сонъ, аьскершидинъ кевдесин бир ерде де тавып болмаганлар. Сол себептен ол буьгуьнлерде сес-хабарсыз йок болганлардынъ сырасына киргистилген. Болса да, Курбан ман бирге согыс кырларында болган йолдаслары ол сол куьн оьзининъ эр борышын энъ ызына дейим толтырып, йигитлерше ян берген деп санайдылар. Быйыл куьзде онынъ кардаш-ювыклары ога багысланган баьри де тийисли аьдетлерди толтырганлар.
М.Ханов.
Суьвретте: Курбан Курбанов согыс йолдаслары ман.
