Дагестаннынъ Ногай районынынъ яшавшылары Россиядынъ баска регионларыннан да толы болмаган мобилизация бойынша Эли алдында борышын толтырмага шакыртылган эдилер.
Кырк кийик айынынъ 21-нши куьниннен алып Россия Президенти Владимир Путиннинъ шакырув этуьви мен Россиядынъ Савытлы куьшлерине савлай элимиз бойынша толы болмаган мобилизациясы оьтеди. Онда Ногай районымыздынъ яшавшылары тек районымыздан тувыл, Россиядынъ туьрли муьйислериннен де катнасадылар. Ясларымыз Сырт як калаларында, айтпага, Сургут, Янъы Уренгой, Нижневартовск калаларында куллык этип келедилер. Сол калалардан олардынъ коьплери мобилизация ман кеттилер. Айтпага, Ногай районынынъ Терекли-Мектеб авылынынъ яшавшысы Куруптурсун Бариев Сургут каласыннан шакыртылды. Оны Элин коршалавга йолга кардаш-тувганлары салдылар. Анасы ога йолга ногай миллет оьтпегин эм асларын аьзирлеп салды. Солай болып, Сургут каласыннан Ногай районынынъ Куьнбатар авыл яшавшысы Динислам Амамбаев те шакыртылды. Динислам – Югорск патшалык университетининъ (технология эм нефть бойынша институты) выпускниги. Окувдан сонъ 2018-нши йыл Динислам Россиядынъ Савытлы куьшлери бойынша танк аьскеринде службасын оьткен. Ол танкты айдавшы механиги болады. Элбетте, оны бириншилердинъ сырасында повестка ман шакырттылар.
Кырк кийик айынынъ 28-нши куьнинде Динислам аьзирликти коьрмеге деп, баска шакырылган яслар ман Омск каласына йол алды. Онынъ белгилеви мен, Элди коршалав эр аьдемнинъ бас борышы болады. Оьз досла́рын йолга салмага келген Эмирлан Шомаров та, ога шакырув повесткасы келсе, Россиядынъ кубыла япсарларын коршаламага бараягы акында билдирди.
– Буьгуьнлерде Элимизге оьз халкларынынъ йигит увылларынынъ ярдамы керегип туры. Россия коьп миллетли, солай болып ол, куватлы эллерининъ бириси болады. Бизге де шерет етип, элимизди коршаламага барган куьн де келер. Ясларга мен аман эсен барып, сав кайтып келгенлерин сагынаман, – деди ол.
Янъы Уренгой каласы оьз яшавшыларын «Прощание Славянки» маршы ман йолга салды. Бизим ердеслеримиздинъ патриотлык сезиминде болувлары бек суьйиндиреди! Алла-Таала сизди коршаласын, эм баьринъиз де аман-эсен Енъуьв мен уьйлеринъизге кайтынъыз! Ногайлар – алдыга!
