Буьгуьнлерде бизим солдатлар эм офицерлер биринши сырада Украинадынъ яшавшыларын нацистлерден коршалап келедилер.
20 ясындагы десантник Тимур Нуралиев Украина еринде спецоперациясы оьткерилип турган куьнлеринде командирин коькиреги мен ябып, йигитлерше яс янын курман этти.

Железноводск каласынынъ аькимбасы Евгений Бакулин оьз Инстаграмм- аккаунтында булай деп язган: «Тимур Новотерский бокс мектебининь ийги боксеры болады. Оны таныганлар ясты ашык, каьмбил, акыллы аьдем деп, билгенлер. Тимур Иноземцево каласынынъ А.Ф.Дьяков атындагы казачество лицейининь тербияланувшысы болады. Яс коьплеген аьдемлерге ярдамга кол созып, тенъ-йолдасларынынъ яшав йолында оьз демевлигин этип келген. Баьтиримиздинь яткан ери еннетли болсын!» – дейди ол каты кайгырувын билдирип.
Тимур 2001-нши йылдынъ шилле айынынъ 25-нши куьнинде Минеральные Воды каласында тувган. Ол Ставрополь крайында яшайтаган ногай халкынынь ваькили эди. Бала шагыннан яс спорттынъ куьрес кеби мен кызыксынып келген, ийги, акыллы яс болып оьскен. Тимур регионда белгили тренери Валерий Поповтынь етекшилиги астында бокс бойынша сулыбын оьстирип келди. Ортакроссиялык эм халклар ара ярысларынынь коьп кайта енъуьвшиси Тимур Новотерский бокс мектебининъ етимисли спортсменлерининъ сырасында болып келди. Ийги хаьсиет сапатлары эм спорт бойынша уьстинликлери уьшин ол Минераловодский бокс командасынынъ капитаны этип сайланган эди. Тимур бала шактан алып бек каьмбил, аьдил болып оьсти. Ювыкларынынъ белгилеви мен, ол мектебте окыганда, кишкейлерди бир де оьпкелетпеге бермей, дайым коршалап келген. Бир кайта ол оьз йолы ман барган кызды да онынъ йолын бувган эм ога намартлык сагынган яслардан куткарган.Тоьбелес басланып та уьлгирмей, кызга коькирексимеге суьйген яслар тез болып эслерин йыйганлар.
20 ясына дейим ногай яс оьз тирилиги мен яшавында коьп салган мыратларын яшавга айландырып уьлгирди. Тимур 2017-нши йыл Кавказ халкларынынъ эм Кубыла Россия казачество лицейин тамамлады. 2018-нши йыл ол бокс бойынша спорт мастерининъ кандидаты, 2020-ншы йыл юрист кесписининъ иеси болды. Сол йылдынъ язлыгында ногай яс эр борышын толтырмага йол алды. Тимур бала шактан оьз атасынынь йолы ман бармага мырат этип, ВДВ службасына аьзирлик коьретаган эди. Онынъ мырады яшавга айланган куьн де келди. Яс оьз атасы Люмир Нуралиевтей болып, десант болды. Ол Ставрополь крайында орынласкан 247-нши гвардиясынынъ десантно-штурмовой полкында оьз службасын оьтип баслады.
Службасы тамамланган сонъ, оьз досларындай болып, контракт бо- йынша ислеп калады. Ол ВДВ десантно-штурмовой ротасынынь согыс коьлик командирининъ орынбасары болады.
Украина еринде спецоперациясы басланганда, олардынъ ВДВ полкынынъ боьликлери бириншилердинь сырасында сонда йолландылар.
Тимур Нуралиев увыт айынынь 26-ншы куьнинде Херсон областининъ Новая Каховка каласында аьскер борышын баьтирлерше толтырувы ман яс янын курман этти.
Бизим аьскеримиздинъ Кубыла-куьнбатарга карап алдыга йол алувында бу бек маьнели стратегиялык пункты эди. Танъ ман яс болган куьби разведкага шыкты, болса да душпан оларды тасада саклап турган болган. Сол ерде каты урыс басланады. Коьп заман кетпей атыслар токтадылар. Ызы ман тагы да бир каты атысувлар басланды. Душпаннынъ ялынлы отынынъ ишинде ол оьз кевдеси мен командирин япты. Булардынь куьби душпанга янаспага амал бермей, йигитлерше согыс юриттилер, ама урыстынъ барысын душпан снайпери туьрлендирди.Уьйкен оькинишке, сол эки каты согысларынынъ тамамында куьптен бирев де аман калмады.
Соьйтип, Тимур Нуралиев Россия Президентининъ Указы ман оьлгеннен сонъ, Йигитлик орденине тийисли этилди. Оьз Эли алдында коьрсеткен йигитлиги уьшин ногай ясты йогарга уьш кайта савыт пан атып Россия Гимны ман коьмдилер.
Минеральные Воды районында Тимурды коьплер ийги таныганлар, билгенлер. Янъы 20 ясына толган яс аьдемнинъ дуныядан капылыстан таювы баьрисине де толтыргысыз йойым болды. Йигит Тимур ясымыздынъ бир неше айдан туваяк саьбийи де атасыз калды.
Баьтирлерше ян берген ердесининъ эстелигине багысланып калада автоювырувы да уйгынланып оьтти.
Солай болып, янын курман эткен йигиттинъ агасы Радмир Нуралиев социаллык тармагында кардаш-тувганларынынь эм досларынынь кайгысын билдирип язган ятлавын ерлестирген.
Ятлавдынъ аьр бир сыдырасында ювык аьдемнинъ замансыз дуныядан тайганына кайгырув, йигитлиги уьшин оьктемлик сезиледи.
Биз де, «Шоьл тавысы» газетасы редакциясынынъ куллыкшылары Тимур Нуралиевтинъ йигитлерше дуныядан таювы ман байланыста каты кайгырувымызды билдиремиз, онынъ ата-анасына, кардаш-тувганларына бассавлык йораймыз.
Суьвретте: Тимур Нуралиев.