Эски заманлардан эсимизде: «Ат ийгиси арыкта билинер, эр ийгиси тарлыкта билинер», – деген соьз де калыпты. «Тарлыкта» дегени соьз маьнесин бу ерде кыйынлыкта, эл басына туьс- кен сынавда деп анъламага керегеди. Дурысында да, тек сондай кайнавлы каты шакта шынты эрдинъ юрегиннен элди куьезлендирген баьтирлиги алавланып тувады.
Бу соьзлердинъ акыйкатлыгын шайытлап буьгуьнлерде россия аьскерлерининъ Украина еринде нацистлерге карсы юритип турган спецоперациясында Ногай шоьллигимиздинъ де уланлары катнасып, оьз эрлигин коьрсетедилер. Олардынъ бириси Алан Авилкеримов янъыларда согыс кайратлыгын ыспатлап, оькиметтен «Йигитлик уьшин» деген элимиздеги энъ сыйлы аьскер медали мен савгаланган.
Алан Руслан увылы 2020-ншы йылда Москвадагы Кызыл байраклы йогары ортак аьскер командалык Ленин эм Октябрь революция орденлери мен савгаланган училищесин окып кутарган эди. Тувган Аталыгына куллык этуьвге офицер антын берген яс авылдасымыз соны эндигиси оьз кыйыны ман аклап баслайды. Быйыл 24-нши февральден алып олардынъ да аьскер боьлигин Украинага киргисткенлер. Сонда Алан мотострелковый взводтынъ командири болып эр борышын толтырган.
Бир айдынъ артында олардынъ взводы нацистлер мен давга кириседи. Бу авыр согыс аьсеринде Алан аягына душпаннынъ тобынынъ кесеги тийип яраланады. Болса да йигерли лейтенант, ярасына да карамастан, согыс ериннен оьзининъ бир неше йолдасларын кавыфсыз ерге шыгармага уьлгиреди. Олардынъ бириси сонъында медсанбатта эси келгенде, Аланга: «Мен сол согыста тири калганым уьшин сага оьмир бойы борышлыман», – деген разылыгын билдирген.
Аьскершилер арасында тутылатаган дослык, кардашлык, берген антына алаллык Аланнынъ канына оьзининъ атасы, аьлиги заманда тийисли тыншаювда болган подполковник Русланнан, нагашатасы, Уллы Аталык согысынынъ катнасувшысы, (ол да лейтенант болган) Ажиакай Акманбетовтан (яткан ери ярык болсын) синъген болар.
Алан Авилкеримов ярасы эмленгеннен сонъ, аьлиги заманда оьз аьскер боьлигинде, Челябинск областинде, офицер куллыгын эндигиси тамада лейтенант аьскер дережесинде бардырады.
Ястынъ анасы Динара – белгили фольклоршымыз, язувшымыз Тагир Акманбетовтынъ кызы, Ставрополь ювыгындагы Михайловск каласындагы балалар бавында ислейди эм увылынынъ йигитлиги мен куьезленеди.
М.Ханов.
Суьвретте: Алан Авилкеримов.
