Россия Президенти толы болмаган мобилизациясы акында шакырувын эткенде, Боранбай авылынынъ яшавшысы Артур Шамакаев Москва каласында эди. Ногай яс, повестка келуьвине де карамай, тувган авылына кайтты эм военкоматка оьзи келди.

«Ногай халкы дайым согыста йигитлик коьрсетуьви мен баскаланып келген. Меним атам – Уллы Аталык согысынынъ катнасувшысы, досларым да спецоперация юруьвинде алды сырада турадылар. Мен оларга оьз ярдамымды этип, Аталыгымыз алдында оьз борышымды толтырмага керекпен. Ногайлар алдыга!» – дейди Артур Шамакаев. Уьстимиздеги йылдынъ кырк кийик айынынъ 25-нши куьнинде Кизляр районында толы болмаган мобилизациядынъ доьртинши куьни оьтти. Кизлярдынъ военный комиссариатынынъ йыйылув пунктына эртеннен алып муниципалитеттинъ авылларыннан кериде болган гражданлары повестка бойынша келип басладылар. Оларга демевлик этип кардаш тувганлары, дослары, ис йолдаслары, авыл яшавшылары да келген эдилер. Мобилизация этилингенлердинъ сырасында оьз эрки мен кетпеге ыхтыярлы болганлар да бар эдилер.

Соьйтип, Боранбай авылынынъ яшавшысы Артур Шамакаев Россия Президенти толы болмаган мобилизациясы акында шакырув эткенде, элимиздинъ бас каласы Москвада эди. Повестка келуьвине де карамай, ногай яс тувган авылына кайтты эм военкоматка борышынынъ шакырувы ман келди. «Ногай халкы дайым согыста йигитлик коьрсетуьви мен баскаланып келген. Меним атам – Уллы Аталык согысынынъ катнасувшысы, досларым да спецоперация юруьвинде алды сырада турадылар. Мен оларга оьз ярдамымды этип, Аталыгымыз алдында оьз борышымды толтырмага керекпен, – дейди Артур Шамакаев.
Оьз ыхтыяры ман кетип бараятканлардынъ санында авыл администрацияларынынъ куллыкшылары, авыл депутатлары да аз тувыл эдилер. Олардынъ сырасын савлык саклав тармагынынъ куллыкшылары да толтырдылар. Эльдар Талибов – кериде болган офицер. Кизляр орталык больницасында куллык эткен, Дагестанда энъ уьйкен врачлар династиясыннан болады. Кизлярдагы шакырув пунктына оны атасы район больницасынынъ бас врачынынъ орынбасары Анатолий Талибов, увылынынъ ойына демевлик этип, йолга салмага келген эди.
«Буьгуьн меним уьйимде уьш увылларым бар, танъла болса мен олардынъ коьзлерине йигерли карамага керекпен. Мени соьйтип бала шагымнан алып атам тербиялаган, мен де соьйтип оьз саьбийлериме тийисли коьрим болмага суьемен. Элим меним уьшин ызгы соьз болмайды. Патшалыгымыз мага билим де, куллык та берди. Буьгуьнлерде мага борышымды кайтармага заман да етти», – дейди врач.
Солай болып, Кизляр районынынъ баска яшавшысы, врач, оьз ыхтыяры ман баратаган Гаджимурат та военкоматка келуьвининъ бир неше себебин айтып кетти.
«Спецоперациясында увыт айыннан алып катнасып келген ердеслериме ярдам этип, оьз ыхтыярым ман кетип бараман. Оларга пайдамды тийдирмеге эм оьзим де согыс сулыбын алмага суьемен», – дейди ол.
Кизляр районынынъ аькимбасы Аким Микиров оьз ыхтыяры ман спецоперациясында катнаспага кететаганлардынъ аьр бирисине уьйкен разылыгын айтты. Увылларын шынты эрлер этип тербиялаган ата-аналарына разылык соьзлерин билдирди. Буьгуьн оьз ыхтыяры ман йолланганлар Борамбай, Жданова, Крайновка авылларыннан эдилер. Оннан бир куьн алдын военкоматка юрек шакырувы ман Первомайское авыл яшавшылары да келген эдилер. Кизляр район яшавшыларында мобилизациядынъ биринши куьнлериннен алып патриотлык ымтылысы бары сезиледи.
Суьвретте: Кизляр районынынъ аькимбасы А.Микиров эм А.Шамакаев.