Ислам Юнусович Курманов Ставрополь крайынынъ Нефтекум районынынъ Каясула авылында тувган. Бир-эки йылдан Курмановлардынъ аьели конъысы Новкус-Артезиан авылына коьшкен. Он ясына толганда, ол суьвретлевге тартылып баслаган.
Ерли ортак билимлендируьв мектебининъ 10-ншы классын тамамлап, Ставрополь каласынынъ художестволы училищесине окувга туьскен. Училищеди 2005-нши йылда битиргеннен сонъ, яс аьдем, билимлерин оьстирмеге ниетленип, Кобан патшалык университетининъ художестволы-графикалык факультетине окымага туьскен. Йогары окув ошагын етимисли тамамлап, колына окытувшыдынъ кеспили дипломын алган. Сайлаган кесписинде Ислам оьзин сол ок студент йылларында сынамага суьйген. Ис аьрекетин ол Нефтекум каласынынъ балалар художестволык мектебинде окытувшы болып баслаган. Йыллар ман сулып та йыйган, халк арасында аты да айтылган. Соьйтип, он алты йылдынъ бойында ол намыслы куллык эткен. 2021-нши йылда Ислам Каясула авылынынъ маданият уьйине яратувшылык кружоктынъ етекшиси болып куллыкка коьшкен. Сол ис орнында да ол оьз шалыскырлыгы ман, куллыкка яваплы каравы ман коллективте сыйды эм оьрметти тапкан. 2021-нши йылда балалар уьшин «Маьметекей» республикалык адабиат суьвретлев журналынынъ тувган тиллердинъ халклар ара куьнине багысланган яратувшылык конкурсында Черкесск каласында Х. Байрамукова атындагы республикалык китапханасында Ислам Курмановтынъ суьвретлер выставкасы озгарылган. Шарадынъ катнасувшылары онынъ куллыкларына йогары белгиди бергенлер. Бир ай артта, Ставрополь каласынынъ байрамында Ставрополь крайынынъ регионлык миллет-маданият автономиясынынъ председатели Зенадин Шандиевтинъ демевлик этуьви мен суьвретшидинъ выставкасы озган. Шарада Ставрополь крайынынъ губернаторы Владимир Владимиров катнаскан эм онынъ куллыкларына йогары белгиди берген. Сондай болып, Ислам Курманов коьплеген Савлайроссиялык, Россия кубыла бойынша суьвретшилерининъ выставкаларында катнасады. Быйылдынъ увыт айында биз оны ман бирге Ямал-Ненец автономиялык округында болдык. Сол заманда Лабытнанги каласында онынъ суьвретлер выставкасы озды. Оны абырайлы ердеслеримиз Бийсолтан Ситеков, Солтан Уракчиев, Виталик Аубекижев уйгынлаган эдилер. Шарада калада яшайтаган коьплеген ногайлар катнастылар, савболсынлар. Кыскасыннан айтсам, Ислам Курманов коьплеген Сый грамоталар ман эм Разылык хатлар ман белгиленген. Соны ман бирге ол тек суьвретши болып калмай, ятлавлар язув ман да каьрлейди.
– Яшавымда яратувшылык эм оьнершилик йолларын мен яныма якын коьрип сайлаганман. Неге десе ногайлар орта оьмирлерден алып дуныяга айтылып келетаган бурынгы халк болады. Сол йылларда халкымыз билекли баьтирлери мен, зейинли йыравлары ман, бакшылары ман белгили болган. Соьйткенде, ногайдынъ халк авызлама яратувшылыгы туьпсиз терен эм айлак бай. Ятлав язув деген сондай аьлемет зат. Ол бирден тувмага болады. Мен, коьбисинше, ятлавларымды тувган ериме – уллы ногай шоьлиме, халкымнынъ аьвелги бактысына, аьлиги яшавына багыслайман, – деп боьлисти Ислам. Эсимде, озган йылдынъ кырк кийик айында биз оны ман бирге Крым Республикасындагы ногайларда болып кайттык. Йолда, автокоьликте, хабарласып бараятырганымызда, ол колына бирден кагыт пан калемин алып, ятлавлар язып баслады. Элбетте, сол затты коьрип, бек суьйиндим. Калемдасымыз куьннен-куьнге оьз калемин оьткирлендируьвдинъ уьстинде белсенли каьр шегеди.
Энди болса, онынъ туьзген берекетли аьели акында да айтайык. Ислам Дагестан Республикасынынъ Тарумов районынынъ Новодмитриевка авылыннан Рупия деген сылув ногай кыз бан юрегин бириктирген. Аьелде олар уьш балады тербиялайдылар. Ян косагы авылдынъ балалар бавында тербиялавшы болып куллык этеди. Соны ман бирге Исламнынъ оьнершилигин де демевлеп келеди.
Караша айында калемдасымыз оьзининъ кырк йыллык мерекесин белгилеек. Биз Ислам Курмановты сол ийгилиги мен кутлаймыз, алдыдагы яратувшылык йолында тек йогары етимислерди, биринши китаплери ярык коьргенлерин, наьсип моллыгын сагынамыз. Окувшыларымызды тоьменде онынъ ятлавлары ман таныстырамыз.
Тувган авылым
Тувдым сенде, Коясыл,
Тербетилдим тоьринъде.
Аьдетлерге уьйрендим
Атайымнынъ уьйинде.
Тувган ерим Коясыл,
Асыл сенинъ койларынъ.
Сербет меним авылым,
Кувнак сенинъ тойларынъ.
Ана юртым
Ана юртым – меним Новкус авылым,
Тувар багып, баладан тамырландым.
Янга якын Ашы сувдынъ бойлары,
Ший талымнан бавырынъда
шыныктым.
Юрегиме айлак ювык эм баа,
Таза сувынъ дем береди аьр кимге.
Куллыгым ман мен каерде болсам да,
Сен, авылым, дайым меним эсимде.
Калай даьмли кув шоьлимде ювсанынъ,
Коьз алдымда каратаспа кырларынъ.
Кишкейимнен асыл эткен сен, юртым,
Берекетли меним Новкус авылым.
А.Найманов.
Суьвретте: шаир эм суьвретши И.Курманов.
