Озган юма Ногай район администрациясында муниципалитет аькимбасынынъ орынбасары Баймагомед Ярлыкаповтынъ етекшилиги мен коллегиядынъ кезекли кенъеси озгарылды. Онынъ исинде Ногай район администрациясынынъ Ямагат палатасынынъ председатели Эльмурза Саитов, солай ок республикалык эм район организациялардынъ етекшилери эм куллыкшылары катнастылар. Йыйында эки сорав каралды. «Ногайский район» МР администрациясынынъ турак -коммуналлык хозяйствосынынъ 2022-2023-нши йыллардагы куьз-кыс мезгиллерине аьзирлиги акында Ногай район администрациясынынъ ЖКХ эм архитектура боьлигининъ етекшиси Алибек Муллаев эм Ногай районынынъ билимлендируьв организацияларында караклардынъ аьрекетиннен сакланув амалларын куьшлендируьв акында муниципалитеттинъ билимлендируьв боьлигининъ методисти Байрамали Бекмурзаев йыйылганлар алдында эсап бердилер.
Алибек Муллаев быйыл эртерек сувык болганы ман байланыста, Ногай район аькимбасынынъ распоряжениеси мен мектебке дейимги билимлендируьв учреждениелеринде 10-ншы октябринде от ягылып басланганын белгиледи. Онынъ айтувы ман, Ногай районында аьрекетлеген билимлендируьв учреждениелеринде газ, электроярык алатлар кулланув эм ис коршалав уьшин яваплы баьри куллыкшылар аттестацияды заман-заманы ман оьтедилер. Мектеблердеги котельняларда ярастырув куллыклар этилинген. Ярык эм газ канагатлав тармаклары ийги ислейдилер. Коьгилдим от тартылмаган авыллардагы мектеблер эм балалар бавлары коьмир эм агаш пан канагатланганлар. Соны ман бирге Алибек Муллаев аьли де шешилмеген маьселелерди де белгиледи.
Сонъ Ногай районынынъ билимлендируьв организацияларында террористлик аьрекетиннен коршаланув амалларын куьшлендируьв бойынша билдируьвди Байрамали Бекмурзаев этти.
– Ногай районынынъ баьри билимлендируьв учреждениелеринде де террористлик аьрекетке карсы куллык юритуьвге эм от туьсуьв кавыфсызлыгы уьшин яваплы аьдемлер беркитилген. Ызгы заманларда районнынъ билимлендируьв учреждениелеринде инженер-техникалык коршаланув амаллары салынувына уьйкен эс этилинеди. Муниципалитеттеги 27 билимлендируьв объектлерине видео камералар салынган, солай ок оларда полиция куллыкшыларын тез шакырув уьшин тийисли алатлар да бар, – деди эсап беруьвинде Б.Бекмурзаев.
Н.Кожаева.