Янъыларда Астрахань каласынынъ «Ногай маданиятынынъ «ЭДИГЕ» орталыгы» деген региональлик яслар-ямагат организациясы белгили ногай фольклоршы Тагир Ажакаевич Акманбетовка, ногай халкы уьшин эткен куллыгын баалап, «Эдиге» деп аталган эстеликли белгисин тапшырды.

Айтув керек, Тагир Акманбетовтынъ аьрекетлиги мен ногайлар яшайтаган баьри регионларда, сонынъ ишинде Астрахань областинде де, эсли яшавшылар ман аьллесип, ногай дестанлар, айтувлар, юмаклар, хабарлар (предания), ынанувлар (поверья), бозлавлар, сарынлар эм халк авызлама яратувшылыгынынъ сондай коьп затларын йыйнаган. Оьз карыжлары аркасы ман ногай тилинде коьплеген китаплер шыгарган. Ногай адабиатынынъ белгили аьрекетшилери Абдул-Хамид Джанибековтынъ, Зейид Кайбалиевтинъ, Джалалдин Шихмурзаевтинъ эм Ашим Сикалиевтинъ аьдетйорыкларын бардырувшы Тагир Акманбетовтынъ ногай халкынынъ фольклорын йыюв уьстинде эткен куллыгы сондай баага тийисли этилгени, оьзек те, оьктемлик тувдырмай болмайды. Белгилеп озайык, Астрахань каласындагы бу региональлик яслар-ямагат организациясы туьзилгенли 15 йылдан артык заман озган. Сол йыллар бойы ол ногай тилин, аьдет-йорыкларын, маданиятын, саниятын, эм адабиатын саклав эм оьрлендируьв ниети мен коьп туьрли шаралар озгарган эм аьли де озгарады. Айтпага, «ЦНК «Эдиге» орталыгы оьткен йылды Астрахань областинде ногайлар яшайтаган ерлерде «Ногай тил йылы» деп белгилеп, ногай тилинде коьп туьрли шаралар озгарган: конкурслар, диктантлар эм сондай коьплеген затлар.