Оьткен юма сонъгы куьн Ногай районында ис борышын толтырув ниет пен Дагестан Республикасынынъ Билимлендируьв министерствосынынъ етекшиси Яхья Гамидович Бучаев болып кетти.
Ол баслап Ногай район орталыгы Терекли-Мектебте орынласкан А-Х.Джанибеков эм Кадрия атындагы орта мектеблерининъ меканларында болды. Бу меканлардынъ осал аьллерин коьрип кетти. Эндиги окув йылдынъ ишинде Дагестан Республикасынынъ Аькимбасынынъ буйырыгы ман ети юз орынлы Кадрия атындагы орта мектебининъ меканынынъ курылысы басланаяк. Яхья Гамидович сол мектебтинъ болаяк еринде де болды.
Яхья Бучаевтинъ Ногай районымызда конакта болганы боьтен де бу йыл мектебти йогары уьстинликли кутарган 12 окувшылардынъ эслеринде калаягына шек йок. Бу куьн олар Дагестан Республикасынынъ Билимлендируьв тармагынынъ министрининъ колыннан «За особые успехи» алтын медалин алдылар.
Йыйылган окытувшылар, окувшылар эм олардынъ ата-аналары алдында соьйлеген Яхья Гамидович Бучаев оларды ак юрегиннен бу куьнлерде етискен уьстинликлери мен кутлады эм алдыда тек ийгиликлерге етисип, элимиздинъ оьрленуьви уьшин ис аьрекетти бардырганды йорады. Кайсы ис орынларда да аьрекет эткен заманларда Яхья Бучаев ногай миллетли халк пан расканы акында айтты эм дайым да олардынъ терен ойларына, акыллылыгына сейирсинип келетаганын билдирди.
Эки йыл артта савлай россиялык окувшылар олимпиадасында терен билимин коьрсеткен Замир Мурзаев акында айтып кетти. Эсинъизге салып озайык, Замир адабиат бойынша савлай россиялык олимпиадада уьстинликлерге етисип, Ортак Патшалык сынавларсыз Москва каласындагы йогары окув ошагына туьскен. Сол заманларда ол тарих бойынша да терен билимин коьрсеткен эди, тек енъуьвши болмага бир балл етпеген.
Ол оьзининъ кутлав соьзиннен сонъ окувшылар Асанбий Батыровка, Милана Кургановага, Айнара Арикбаевага, Айсель Кокуровага, Замир Якубовка, Рукият-Ханум Акимовага, Алина Кусеповага, Элина Муллаевага, Амелия Аджиниязовага, Динара Шомаровага, Лейла Кошановага, Хадижа Салимовага тийисли савгалары – медальлерин тапшырды.
Оннан сонъ соьзди Ногай район Билимлендируьв тармагынынъ етекшиси Алтын Даут кызы Агаспарова алды. Ол да окувшыларды кутлап, аьр бирисине Сый грамотасын тапшырды эм окув йыллары ишинде туьрли район, республика кезеклеринде озгарылган шараларда йыйы катнаскан А-Х.Джанибеков атындагы орта мектебининъ окувшылары Асанбий Батыров пан Милана Кургановады белгиледи.
Ата-аналар атыннан Альфия Амирхан кызы Акимова соьйледи. Ол бу куьнги оьзгерис тек олардынъ тувыл, окувшылардынъ да эслеринде сакланаягын билдирип кетти.
Окувшылар атыннан бу йылгы Ортак патшалык сынавды орыс тилиннен йогары уьстинлик пен оьткен Айсель Кокуровага соьйлемеге ыхтыяр берилди.
– Бу куьн оьзи куванышлы, оьзи бираз кайгылы, бизим алдымызда ашык йоллар, артта мектеб йыллар. Биз бу куьнги уьстинлигимиз уьшин окытувшыларымызга эм ата-аналарымызга уьйкен ра- зылыгымызды билдиремиз эм келеекте олардынъ сенимин аклаякка соьз беремиз, – деди ол.
Йолыгыс эстеликке суьвретлерге туьсуьв мен тамамланды.
Г.Сагиндикова.
Суьвретте: ДР Билимлендируьв министри окувшылар ман эм район етекшилери мен.
