Оьткен саьрсемби куьн, 20-ншы казан айында, Терекли-Мектеб авылдынъ Кадрия атындагы орта мектебинде халкымыздынъ аьлиги замандагы алдышы поэти, И.Насими атындагы тюрк халклар ара адабиат баргыдынъ иеси, ДР ат казанган саният куллыкшысы Мурат Авезовтынъ 70 йыллыгына багысланып адабиат-анъ шарасы болып озды.
Сол шарады мектебтинъ етекшилери, окытувшылары, китапхана етекшиси Марина Межитова, уйгынлап озгардылар. Сонда ана тил дерисининъ окытувшылары Насипхан Хасбулатовадынъ, Мархаба Мансуровадынъ, Нурбийке Кельдасовадынъ эм баскалардынъ окувшылары катнастылар.
Шарады окытувшылар Насипхан Хасбулатова ман Альмира Баякаева юриттилер. Сонынъ барысында мектеб окувшылары белсенли катнасып, поэттинъ ятлавларын окыдылар, онынъ «Шымшык эм патша» деген эртегиси бойынша сценка коьрсеттилер. Кобызшы, ДР ат казанган артисти Бегали Куруптурсунов, мектеб китапхана етекшиси Марина Межитова поэттинъ соьзлерине язылган йырларды йырладылар.
Шарада соьз Мурат Авезовка берилди. Ол оьзининъ атыннан соны аьзирлегенлерге разылыгын билдирди. Поэт аьлиги заманда мектебте окыйтаган балалар ногай тилди билетаганын эм билмеге шалысатаганын айтып белгиледи.
– Бизим тил йойылмаган эм йойылмаяк. Бурынгыдан бери айтылып келеди: «Элинъди, дининъди, тилинъди сакла», – деп. Элинъди сакласанъ, халкынъ сакланар, халкынъ сакланса, тилинъ де сакланар, еринъ де сакланар. Аьдемде ери де, тоьри де, коьри де болмага керек, онсыз дуныядагы аьдемнинъ яшавы маьнесиз. Сизде аьлиги заманда билим алмага амаллар бек коьп, уьйкен аьдем болмага анъсатлыклар аьруьв. Мен бала заманымда сизикиндей онъайлык болмаган. Ногайдынъ келеектегиси сизи мен байланыслы, сизге биз аманатлаймыз баьри затты, – деген ойын билдирди Мурат Авезов.
Муннан сонъ поэтти Ногай район билимлдендируьв боьлигининъ етекшиси Алтын Агаспарова кутлады. «Бу кешлик баьримиздинъ де юреклеримизде калып, оннан сонъ да поэттинъ ятлавларын кайтадан окымага себеп болар деп ойлайман. Сиз, балалар, Мурат Авезов айтканлай, тилди мутарсыз деп шексинмеймен, сондай бай ана тилимизди йоймага керек тувылмыз», – деди ол эм поэтке савга тапшырды.
Солай ок Мурат Авезовка ийги йоравларын мектеб директоры Альфия Акимова да айтты.
Шарада поэт, «Шоьл тавысы» республикалык газетасынынъ боьлик редакторы Магомет-Али Ханов катнасты эм поэттинъ яратувшылыгы акында оьз ойлары ман боьлисти.
Суьвретте: шарадынъ катнасувшылары.
