Уьстимиздеги йылдынъ кырк кийик айынынъ 21-нши куьнинде Терекли-Мектеб авылынынъ А-Х.Ш.Джанибеков атындагы орта мектебинде Уллы Аталык согысынынъ ветераны Хайрудин Аджидаирович Лукмановтынъ сыйына эстелик кешлиги уйгынланып оьтти. Бу йыл ол тувганына 100 йыл болды. Шарада согыс ветераннынъ кардаш-тувганлары, район ямагаты, окытувшылар эм окувшылар ортакшылык эттилер. Шарадынъ барысында йыйылганлар согыста бизим эркинлигимиз уьшин янларын курман эткенлерди бир такыйка уьндемей турувы ман эскердилер.
Шарага йыйылганларга мектеб юнармеецлери согыс ветераннынъ яшав йолы акында толы хабарладылар.
– Хайрудин Аджидаирович Лукманов Уллы Аталык согысы басланганда фронтка оьз эрки мен йолланады. Ол Куьнбатар, Калининский, 3- нши Белорусский фронтларында катнаскан. Хайрудин Аджидаирович 31-нши армиядынъ 220-ншы стрелковая дивизияда, 660-ншы артиллериялык полкынынъ сырасында катнасып, «Багратион» операциясында да ортакшылык эткен. Неман йылгасын оьтуьвинде берилген борышын етимисли толтырувы ман Кызыл Юлдыз орденине тийисли этилген. Польша, Куьнтувар Пруссия, Германия, Чехословакия, Австрия, Венгрия, Румыния эллерин гитлерши фашистлерден босатувда катнаскан. Ол районнынъ ямагат яшавынынъ белсенли катнасувшысы да болган. Лектор-пропагандист, политинформатор, районнынъ согыс ветеранлар советининъ председатели, районнынъ яслар насихатшылар советининъ председателининъ орынбасары, район военкомынынъ политика боьлиги бойынша ямагатлык орынбасары, район футбол федерациясынынъ председатели эм ветеран сондай баска ямагат ислерин де етимисли юритип келген, – деп мектеб юнармеецлери йыйылганларга хабарладылар.
Дагестан шаири Р. Гамзатовтынъ соьзлерине язылган «Турналар» деген йырын йырлап эситтирдилер. Баска болып, 9-ншы «б» класс окувшылары, краеведлик кружогынынъ агзалары А.Ваисова эм А.Менглиязова согыс акында ятлавды уьйкен сезим мен яттан окыдылар. Оннан сонъ 11-нши класс окувшысы М.Ахмаджанов ветераннынъ эстелигине багысланган ногай тилинде «Эл алдына келсене» деген С.Суюновтынъ ятлавын йогары коьнъилде окып эситтирди.
– Хайрудин Аджидаирович аьлемет педагог, акылбалык насихатшы эди. Мундай йолыгыслар бизге авылымыздынъ ямагат яшавында оьзининъ уьйкен косымын эткен эм бизим савлайымызга да уьлги болып келген аьдемлер акында эскермеге бек керекли, – деди мектеб етекшиси Курасхан Ярикбаева.
Баска болып, шарада ветераннынъ увылы Абрек-Заур Лукманов эм кызы Тамара Джанибекова да соьз айттылар. Олар шара уйгынлавшыларына уьйкен разылыгын билдирдилер. Солай болып, олар йыйылганларга атасынынъ акында йылы эскеруьвлери мен боьлистилер, ветераннынъ яшавыннан алынган кызыклы кесеклерди хабарлап эситтирдилер. Лукмановлардынъ аьели атыннан Тамара Джанибекова «Соьз казнасы» («Сокровищница слов») деген белгили ногай ярыкландырувшысы, педагог, халк авызлама яратувшылыгын йыювшы, ногай фольклорын тергевши эм баспалавшы А-Х.Ш.Джанибековтынъ китабин савгалады. Солай болып, ветеран Хайрудин Лукмановтынъ эстелик кешлигинде оьз окытувшысы акында эскеруьвлерин онынъ окувшысы Рашид-Хан Отарбаев те айтып кетти.
Соьйтип, шара йылы аьлде эм йогары коьнъилде оьтти.Белгилеп озайык, баска болып, Уллы Аталык согысынынъ ветераны Хайрудин Аджидаирович Лукмановтынъ 100 йыллык мерекесине багысланып, Ногай районында йыл сайынлык 30-ншы футбол бойынша турнири озгарылды.
Г.Нурдинова.
Суьвретте: шарадан коьринис.
