Янъыларда Кадрия атындагы орта мектебинде Ногай районынынъ ерин немец-фашист аьскерлериннен босатувынынъ 80 йыллыгына багысланып, шара оьтти. Шарада Ногай районынынъ уьлке танув музейининъ етекшиси Каирбек Бальгишиев, Ногай районынынъ Хатын-кызлар советининъ председатели Асият Манкаева, орыс тил эм маданият дерислери бойынша окытувшы Марина Межитова эм йогары класслар окувшылар советининъ агзалары ортакшылык эттилер.

Шарады мектеб етекшисининъ тербиялав иси бойынша орынбасары Зульфия Отарова юритти. Ногай районынынъ уьлке танув музейининъ етекшиси Каирбек Бальгишиев шарага йыйылганларга согыс йылларында районымызда оьткен согыс оьзгерислери, солай болып, оьз ерин фашист баскыншылардан босатувда район яшавшылардынъ катнасувлары акында, Махач Дахадаев атындагы партизан отрядынынъ туьзилуьви акында кызыклы хабарлады. Оннан сонъ Ногай районынынъ Хатын-кызлар советининъ председатели Асият Манкаевага соьз берилди.
– Уллы Аталык согысы басланганда, Караногай районыннан 2500-ден артык аьдемлер фронтка йолландылар. Олардынъ ишиннен тек 600 аьдем, айтпага, олар согыстан сонъ бузылган хозяйстводы кайтадан коьтеруьвде оьз косымын эткен яраланганлар, сакатлар эдилер. Район еринде болган техникады, уьйкен эм кишкей малды бизим еримизден Тарумов ерине эм аьли де баска ерлерге согыска бармай калган картлар, кыскаяклылар эм балалар шыгардылар. Олардынъ ис йигитлиги аркалы 1942- нши йыл 157 мынъ койлар, 5 мынъ уьйкен мал, 2 мынъ авыл хозяйстволык техника инвентари, 200-ге ювык атлар районнан шыгарылды. Кыскаяклылар кешелеп уйкламай, фронтка 300 тонларын, 1500 юн шорапларын, 200 боьрклерин, фронтка 1 миллион акшалай ярдамын да эткен, – деди Асият Манкаева. Баска болып, ол ногай кыскаяклылардынъ, айтпага, Куьнбатар авыл советининъ председатели Кунбийке Мусаева, Дмитров атындагы колхозынынъ куллыкшысы, комсомолшы Кадырбийке Кулушевадынъ эм сондай баскалардынъ согыс йылларында эткен йигитликлери акында кызыклы хабарлады. Сол каты согысувлар юруьв заманында «За трудовую доблесть» деген савгасына Караногай районыннан 44 кыскаяклылары тийисли этилгенин, 500 кыскаяклылары татавыллар, окоплар казувда катнасканлары, солай болып, Астраханьнинъ балыкты асыллав тармагында куллык эткенлери акында айтып кетти.
Окытувшы Марина Межитова партизан отрядынынъ уйгынлавшыларынынъ бириси оьзининъ нагашатасы Куруптурсын Сахтаев акында кызыклы хабарлап эситтирди эм йыйылганларга тынышлыкты, йогарында таза коькти сагынды.
Кадрия атындагы мектебининъ 7 «б» класс окувшысы Амирлан Толемишев Терекли-Мектеб авыл яшавшысы Рустем Гапаровтынъ атасы согыс ветераны Будайхан Гапаровка язган ятлавын йогары коьнъилде окып эситтирди.
Окувшылар конакларга партизан отрядынынъ туьзилуьви бойынша кызыксынган соравларына тийисли явапларын алдылар.
Соьйтип, бу эстеликли оьзгериске багысланып оьткен шара пайдалы эм йогары коьнъилде озды.
Г.Нурдинова.
Суьвретте: шарадынъ озгарылув мезгили.