Нариман авыл орта мектебининъ суьврет ясав сабагыннан окытувшысы Нурманбет Танъгатар увылы Зарманбетовты Ногай районымызда танымаган эм сыйламаган аьдемлер саны аз болар. Ол баьри юрек йылувлыгын балаларга берип келеди.

Элимиздинъ келеектегисин тербиялавга да аз куьшин салмаган эм онынъ кол астында бир неше несил патриотлык билимин алган деп айтпага болады. Ол бу кыйынлы куьнлерде де оьзи окытатаган балаларга шынты патриотизмди коьндирмеге коьп шалысады, оьзи де кайгылы куьнлерде яркын суьвретлер ясап, яшавга ярыклык эндирмеге бек суьеди.
Ол янъыларда А.Асанов атындагы мектебининъ ишинде россия аьскерлери юритип турган согыс спецоперациясында катнасатаган эм ян берген ердеслеримиздинъ эстелигине багыслап, тап соьйтип аталган, «Памяти земляков-ногайцев» деген проектин яшавга шыгарды. Бу проект бойынша балалар суьвретлер ясадылар. Сол суьвретлер ССИТ балалар суьвретлери конкурсына да йиберилди. Бу шарада Нурманбет Танъгатар увылы Зарманбетовтынъ окувшылары тек аьли катнасканы йок, бу шарада олар бир неше кере енъуьвши де болганлар эм етекшиге бир неше разылык хатлар да келгенлер. Аьли де ол сол организациядынъ сертификация бойынша етекшиси Ю.Родинадан разылык хат алды. Сол хатта Ю.Родина Нурманбет Танъгатар увылына ден савлыкты, ярык келеектегиди йорады.
– Согыс деген бек авыр соьз. Сонда йойымлар да боладылар, кайгырамыз. Савболынъыз ярасык суьвретлер уьшин, балалардынъ ердеслери уьшин янлары авырувлары бояклар ман коьрсетилген, – деп язылган сол хатта.
Оьзек те, ян авырыйды йойымлар акында эситсек. Аз санлы ногай халкымыз сол согыс спецоперациясында йигитлеримиз Тимур Нуралиевти, Кайтарбий Елманбетовты, Арифулла Байрамовты, тек туьнегуьнлерде Амирхан Мурзагельдиевти … йойды.
Юрек кайгырады, коьзяслар тоьгиледи, шоьллигимде тагы танълар оларсыз атады, куьн де батады. Авыр болады, заман да муттырарман дейди, тек бермейди эс мутпага. Олар бизим дайымларга эсимизде.
Г.Курганова.
Суьвретте: Н.Зарманбетовтынъ проекти бойынша аьзирленген там газетасы.