Ногай районымызда Яшавшыларды социаллык ягыннан коршалав тармагы коьп йыллар бойы аьрекет этуьви аркалы коьплеген ярдам керексинетаган яшавшылардынъ яшав аьллери енъилленип баслады. Бу тармактынъ аьрекетлеви аркалы аьр бир авыл еринде ярдам керексинетаган ясуьйкенлерге, сакатларга, ярдам керек колайсыз яшайтаган, амалсыздан авыр аьллерине туьскен баьри керексинетаганларга демевлик этилинип келеди.
Сол тармакта мине коьп йыллардан бери Ногай районынынъ Кумлы авылыннан Асиет Биймурзаевна Булатова (Буланбаева) яваплы куллык этип келеди.
Асиет Биймурзаевна 1972-нши йылдынъ кырк кийик айынынь 25-нши куьнинде Шешен Республикасынынъ Бурунское авылында тувган. Мектебти тамамлап, кыскаяклы 1990-ншы йыл Махачкаладагы педагогикалык институтка туьсип, оны етимисли тамамлайды.
Социаллык тармагына кыскаяклы 1998-нши йыл келди. Сол куьннен алып Асиет оьзининь яшавын социаллык аьрекети мен тар байланыстырып келеди. 2014-нши йыл Асиет Биймурзаевнады социаллык иси бойынша специалисти, оннан сонъ 2016- ншы йыл, тармакта туьрленислер барувы ман, тамада социаллык куллыкшысы этип айырадылар. Кумлы авылында онынъ етекшилиги мен социаллык куллыкшылары Зумруд Исаева, Сабират Аджатаева, Нарбийке Коккозова, Румия Межитова ярдам керексинетаган 45 авыл яшавшыларын социаллык ярдамы ман канагатлап келедилер. Олар киретаган Ногай район КЦСОН тармагынынъ1-нши номерли уьйшиликте социаллык ягыннан канагатлав боьлигин Альфира Эсенбаева етекшилеп келеди. Олардынъ аьр бирисине авылдынъ 9 аьдемлери беркитилгенлер. Ярдам керексинетаган аьдемлердинъ уьйлерине заманы ман барып уьй йыйыстырып, ас асып, керекли азык-туьликлер, дарманлар аькелмеге коьмек этедилер. Ясуьйкенлердинъ кан оьлшемин, эт кызувын тергейдилер.
Социаллык куллыкшылары аьр бир канагатлайтаган аьдемлердинъ ден савлыгы акында сорап, коьнъилине етпеге асыгадылар, ялгызлыгын билдирмей, юзлерине куваныш косадылар. Ясуьйкенлер болса, социаллык куллыкшыларынынъ аьр бирисин уьйлеринде сыйлы конагындай саклап карайдылар. Асиеттинъ белгилеви мен, олар тек керексинетаган аьдемлерге ярдамласып калмай, авыл бойынша озгарылатаган байрам шараларында, авыл администрациясы ман озгаратаган субботниклерде, авылдынъ ямагатлык яшавында да белсенли катнасып, оьз уьлислерин косып келедилер.
Оьз исине яваплы каравы, куллыксуьерлиги мен Асиет авыл яшавшылары арасында сый да, абырай да казанган. Коьп йыллык яваплы иси, куллыгында йогары коьрсетимлери эм ис борышын коьримли толтырып келгени уьшин Асиет коьп кере Сый грамоталары ман савгаланган.
Исинде яваплы куллыкшы болып калмай, ол наьсипли ана да болады. Асиет ян косагы Айнадин мен эки сылув кызлары Емисхан эм Эльнарады тербиялап оьстиргенлер. Буьгуьнлерде олардынъ куьезин уьш йиенлери арттырып келедилер.
Мен Асиетти эм онынъ ис йолдасларын кеспи байрамы ман кутлайман, оларга ден савлыкты, узак оьмирди йорайман. Эткен яхшылыкларынъыз мынь кабат болып кайтсынлар!
Г.Нурдинова.
Суьвретте: Асиет Булатова.
