Оьсип келеяткан несилди оьзининъ тувган ерин суьйип, халкынынъ аьдетлерине, маданиятына эс эттирип тербиялав аьлиги заманга келисли борыш болады. Сога коьре, балаларды ата-бабаларымыз асабалыкка калдырганды суьйип эм сыйлап уьйретуьв керек. Бурынгы саз алатларда балаларды ойнап уьйретуьв де сол патриотлык тербиялавга киреди. Саз алатларда ойнап билуьв саьбийлерге оьзин халкынынъ бир кесеги этип сезбеге, аьвелгиди бааламага, келеектегимиз уьшин ойланмага амал береди. Ногайымыздынъ ата-бабалардан калган саз алатларынынъ бириси домбыра болады. Онынъ орыны, маьнеси халкымыздынъ яшавында бек уьйкен болган. Аьли де домбыра яс несилге оьзининъ халкынынъ аьвелгисин, онынъ уллы болганын коьрсетип, эсине салады. Балаларды патриотлык яктан тербиялав сыйлы исин юритеди Сраждин Батыров атындагы саниятлар мектебининъ окытувшысы Ралина Махмудова. Ол коьп йыллардан бери балаларды ногайымыздынъ саз алаты домбырада ойнатып уьйретип келеди. Ралина Махмудовадынъ окувшылары туьрли район эм республика кезеклеринде озган конкурсларда катнасадылар. Олар тек ортакшылык этип калмай, туьрли баргылы орынларды бийлеген заманлар да аз болмаган.
Янъыларда Ралина Махмудова туьзген «Юлдызлар» ансамблининъ катнасувшылары Махачкалада озган «Меним Тувган ерим– Россия» деген Россия халкларынынъ аьдетли маданиятынынъ орталыкларынынъ терроризмге карсылык тутув бойынша агитациялык программаларынынъ Республикалык фестивалинде катнастылар. Мунда Ралина Махмудова яс несилди патриотлык эм эдаплык яктан тербиялавы уьшин ДР Маданият министерствосынынъ дипломы ман савгаланды. Муннан бир аз алдын «Юлдызлар» ансамблининъ балалары Хасавюрт каласында озган «Меним Тувган ерим – Россия» зональный фестивалинде ортакшылык эткен эдилер. Сонда Дагестаннынъ 26 районыннан эм 9 каласыннан катнаскан балалардан энъ де ийги этип оьнерин коьрсеткенлерди Махачкалага фестивальге шакырдылар. Оьктемликке, солардынъ сырасында бизим С. Батыров атындагы мектебининъ окувшылары – «Юлдызлар» ансамблининъ катнасувшылары да бар болдылар. Олардынъ атларын айтып озайык, Ибрагим Аджибекберов, Саида Найманова, Булат Толубаев, Башир Шекиров эм Нурлан Янгишиев. Балаларымыздынъ ийгилер сырасында болувы тек окытувшылары уьшин тувыл, баьримизге де уьйкен куьез.
Н.Эрежепова.
Суьвретте: Р.Махмудова оьз окувшылары ман.