Бу куьнлерде бизим йигитлеримиз Украина еринде озгарылаяткан спецоперациясында катнасып, Аталыгымыздынъ кавыфсызлыгын эм 8 йыл узагына коьп кыйынлыклар, корлыклар коьрип келген ДНР эм ЛНР яшавшыларын коршалайдылар. Савлай элимиздинъ яшавшылары бизим коршалавшыларымыз – аьскершилер уьшин янлары авырып, оларга кайдай болса да колтыклав этпеге шалысадылар.
Ногай районында Хатын-кызлар совети мен уйгынланып, «Аьскершиге анадан посылка» деген акция оьтти. Бу посылкалар буьгуьнлерде Украина еринде спецоперацияда катнаскан ясларымызга эм эр борышын толтырып турган аьскершилерге каратылган. Белгиленген акцияда Ногай районынынъ баьри яшавшылары: туьрли организацияларда ислеген хатынлар, предпринимательлер, увыллары службасын бардырган аналар, эслилер, балалар ортакшылык эттилер. «Ногайский район» МР администрациясы посылкаларды Махачкалага еткермеге коьлик айырды.
– Тувган ериннен алыста увылларымыз бизим каьр шегуьвимизди, аналардынъ юреклерининъ йылувын сезсинлер эм олардынъ этип турган иси – йигитлик экенин билсинлер деген ниет пен бу акция озгарылды. Бир неше куьн узагына хатын-аналар таьтли зияпетлер, шайлар, ювынганда кулланылатаган алатлар, балалар ясаган суьвретлер, хатлар аькелип турдылар.
Хатлардынъ бирисинде аьскершиге анасы булай язады: «Увылым, мен сени бек суьемен. Сен эм сенинъ согыс йолдасларынъ уьшин дайым Кудайдан тилек тилеймен. Сенинъ аман-эсен эм сав болып уьйге кайтканынъды куьтемиз. Сени мен тезден йолыгысаягыма сенемен».
Буьгуьн биз Украина еринде ян берген йигитлеримиз уьшин кайгырамыз. Бу каза бизим районнан да узак болмады. Спецоперация барысында бизим район яшавшысы Кайтарбий Елманбетовтынъ яны курман болды. Аьдемди, боьтен де сондай яс, ярасык йигитлерди йойытув кыйын. Биз дайым да оларды эсимизде саклармыз.
Акцияда катнасканлар сырасында 2014-нши йылда Украинадан Россияга бизим Ногай районга келмеге амалсыз болганлар да бар эди. Коьзяслары ман олар сол йыл болган оьзгерислер акында хабарлайдылар эм сав дуныяда тынышлык болганын куьтедилер, – деди Ногай район Хатын-кызлар советининъ председатели Асият Манкаева.
Н.Кожаева.
