Элимизди коршалав кайсы заманда да йогары яваплык эм аьдемнинъ ваьлий борышы болып саналган. Оьзининъ ерин яны ман суьйген аьр кимге де Аталыктан баа бир зат та болмаган, йок эм болмаяк.
Сондай токтаска ердесимиз Бадрудин де келди, неге десе баскалай этип болмаяк эди. Элимизге кыйынлык тувганда, ол тасага тыгылмады, аьелинде ялгыз увыл экенине де, анасына тирев эм сеним болганына да карамай, военкоматка келип оьз эрки мен баратаганын билдирди. Соьйтип, Сулак авылынынъ яшавшысы, ногай халк ваькили Бадрудин Атаев оьз эрки мен согыс спецоперациясы юрген ерге йолланды. Махачкаладынъ 18-нши номерли орта мектебининъ 9-ншы классын тамамлаган сонъ, Бадрудин сол ок калада промышленно- экономический колледжге туьседи. 3-нши курстан сонъ яс аьскер сырасына йол алады. Бадрудин танковый боьлигинде эр борышын толтырган.
Аьскер сырасыннан кайткан сонъ, туьрли ислер мен каьр шеккен. Онынъ авылы Сулак йылгасынынъ эм Каспий тенъизининъ ягасында ерлескен саялы, яс балык ыслав ман да аьвликкен.
Бадрудин, онынъ баьри тенълериндей болып, шегуьвли эм дурыс абыт этти, юрек шакырувы ман Элимизди коршаламага бармага токтасты. Анасы, тувган кардашлары, дослары, ювыклары, таныслары йылы соьзлери мен ясты йолга салдылар. Аьскершиге олар наьсипли йолды, алдына салынган борышты яваплы толтырганын эм тез болып, аман-эсен кайтканын йорадылар.
Солай болып, оьзиниъ телеграм-каналында Бадрудин Атаевке йорав соьзлерин Махачкала Аькимбасы Салман Дадаев те язды.
– Аявлы йолдаслар! Оьз эрки мен кеткенлердинъ сырасын Сулак авылыннан Бадрудин Атаев те толтырды. Бадрудиннинъ айтувы ман, неонацистлерди аьлиги орынласкан ерлерине карсы турып киргизбев бизим буьгуьнлерде негизли борышларымыздынъ бириси болады. Бадрудин оьз ердеслерине военкоматка коркпай келмеге шакырады. Онынъ белгилеви мен военкоматта аьр ким мен де айырым кенъес юритиледи, аьскершилик кардашлыгы да – ол аьр биримиздинъ уьйимиздеги аьелимиздей болады. Соьйтип махачкалашылар парахат эм уьйкен сый ман Элимиздинъ келеектегиси, аьлигиси эм оьзи уьшин де дурыс токтасын этедилер.
Оьз ягымыздан биз толы болмаган мобилизациясын яклап, спецоперациясында ортакшылык этуьвге йолланган махачкалашыларынынъ аьеллерине ярдамласаякпыз. Кала штабына ярдам тилеп язылган аьризелер туьсип баслаганлар, олардынъ савлайы да каралаяклар. Бадрудин, сенинъ тувган авылынъ Сулак та, Махачкала да сени мен. Сени аман эсен Енъуьв мен уьйинъе кайтканынъды йораймыз. Кудайымыз сени эм сенинъ касынъдагы ясларымызды да коршалаганын тилеймиз! – деп язган оьз телеграм-каналында Дагестаннынъ бас каласынынъ аькимбасы Салман Дадаев.
Бу куьнлерде Бадрудин Атаев оьз аьскершилик борышын уьйкен яваплык пан толтырып келеди, онынъ юреги анасы, тувган-кардашлары уьшин парахат. Ол оьз тувган ериннен алыс болса да, оьзининъ ялгыз тувыл экенин биледи. Бадрудинге онынъ тувган еринде сенедилер эм аман-эсен уьйине кайтып келуьвин саклайдылар.
Г.Нурдинова.
Суьвретте: Бадрудин Атаев.
