Кизляр каласынынъ военкоматынынъ касында элин коршалавга йолланган йигитлеримиздинъ керексинуьвлерин толтырув аьрекетинде белсенлик пен ортакшылык эткен предприниматель Газимагомед Газимагомедов «Дагестаннынъ халк баьтири» деген сыйлы атына тийисли этуьви мен бирге «Алтын юлдыз» медалине тийисли этилди. Предприниматель аьр куьн эртен ерли военкоматка келип, элин саклавга йолланаяк ясларга эм оларды йолга салмага келген кардаш-тувганларына уьйкен казанда плов асып эм самоварда шай аьзирлеп келеди. Оннан баска болып, Г.Газимагомедов ярдам югин еткеруьвде, олар ман бирге барып, Бердянск каласынынъ 4 мынъга ювык яшавшыларын ашаткан. Солай болып, саваплык акцияларыннан баска, Газимагомедовлардынъ аьели 28 межигитин салувда ярдамласкан эм яшавшыларга дарманлар алувда да оьз демевлигин этип келеди.
Оннан алдын Газимагомед Газимагомедовка оьз разылыгын Дагестан Аькимбасы Сергей Меликов та билдирген эди. «Элин коршалавга йолланаяк ясларымызга ата ягыннан эс, каьр шегуьв, боьтен де, бек маьнели болады. Газимагомед ак ниетли ярдамы эм юмарт юреги уьшин коьп савболсын!», – деп язган эди телеграм-каналында Дагестан Аькимбасы Сергей Меликов.
Янъыларда Кизляр кала орталык больницасынынъ ериндеги межигитте предприниматель Рабиуль-авваль айына багысланган шатлыклы маджлисин уйгынлап озгарды. Ол эм онынъ ян косагы Загра Газимагомедова каладан эм конъысы районларыннан келген коьплеген конакларды, больница куллыкшыларын эм онда эмленгенлерди хош коьрип алдылар, оларга уьйкен маджлисте ортакшылык эткенлери уьшин разылыгын билдирдилер.
Загра Газимагомедовадынъ белгилеви мен, аьел карыжларына салынган межигитте маджлисин олар сегизинши кере уйгынлап озгарадылар.
Суьвретте: Газимагомед Газимагомедовка савга тапшырылув мезгили.