Ногай районында Сырт территориаллык округы бойынша Дагестан Республикасынынъ Юстиция министерствосынынъ ЗАГС Управлениесининъ ЗАГС боьлиги гражданлык аьл акында актларды оькиметлик эсапка алув эм кайтадан документлер, архивтен справкалар беруьв, анкеталар туьзуьв, оларды Дагестан Республикасынынъ Юстиция министерствосынынъ ЗАГС Управлениесиннен тийисли компетентли органларга йиберуьв соравлары бойынша гражданларды кабыл этеди. ЗАГС боьлигининъ куллыкшыларында каты куьн эм дуьйсемби куьн – тыншаюв куьнлери. Боьликте 2021-нши йылдан алып 2 куллыкшы аьрекетлейди: бас эм алдышы специалистлер.
ЗАГС боьлигининъ исин тергей келип, айтып озайык, районда озган 2021-нши йылда 2020-ншы йыл ман тенълестиргенде, эсапка алынган гражданлык аьл акында актлардынъ саны оьскени аянланады. ЗАГС боьлиги мен 2021-нши йылда 641 акт эсапка алынган (2020-ншы йылда – 592). Сонынъ санында бала тувув акында 224 акт эсапка алынган. Ол, озган 2020-ншы йыл ман тенълестиргенде, 24-ке кем болады. 2021-нши йыл районымызда 107 кеде бала, 114 кыз бала, бир аьелде эгиз балалар тувган. Озган 2021-нши йылда ата-аналар балаларына такпага мунавдай атларды коьп сайладылар, кеделерине – Мухаммад, Рамазан, Сулейман, Билал, кызларына – Сафия, Аиша, Асиля, Султана.
Йогарыда белгиленген кесек заман ишинде 200 аьдем оьлгени эсапка алынган, сол 49-га артык болады, оннан алдынъгы йыл ман тенълестиргенде.
Солай ок эсап беруьв заман ишинде янъы аьеллер курылув акында 60 акт эсапка алынган, сол оннан алдынъгы йыл ман тенълестиргенде 21-ге кем болады.
2021-нши йыл аьеллер бузылув акында 83 акт эсапка алынган, сол 2020-ншы йылга коьре 47-ге артык болады.
Атын авыстырмага аваслыгы болган 13 аьдем бизге келген, олардынъ саны 2020-ншы йыл ман тенълестиргенде 5-ге артык.
2021-нши йылда ЗАГС боьлиги мен юридически ягыннан маьнели болган 955 аьрекет каралган. Солардынъ сырасында туьрленислер киритилген акында 26 беркитуьв кагыты берилген. 912 шайытлама тапшырылган, сонынъ ишинде 271 – кайтадан. Актлар эсапка алынувы акында 417 справка берилген. 18 сорастырув (запрос) каралган, солардынъ сырасында – суд органлар, ФСБ эм прокуратура.
Актларды эсапка алув уьшин 2021-нши йылда – 245900 маьнет, 2020 йыл – 216100 маьнет акша патшалык пошлина алынган.
ЗАГС архивинде 1943-нши йылдан алып актлардынъ язувлары болган китаплер сакланады. Олардынъ саны 370-ге дейим етеди, актлар язувлары болса 60 000-нан артады.
ЗАГС боьлигининъ 2022-нши йылга оьз алдына салган маьнели борышлары: Ногай район еринде гражданлык аьл акында актларды толысынша, законды тутып, заманы ман эм дурыс аьлде эсапка алув, солай ок архив фондын аман саклав.
