Мине коьп йыллар бойы Асиет Союновна Саитова Ногай районында мировой судьядынъ енъиллерден болмаган, ис аьрекетин, йогары дережеде яваплы толтырып келеди. Асылы ман Асиет Союновна Ногай районынынъ Кумлы авылыннан болады. Оьз тенълериндей болып, ерли мектебте билим алган.

Мектебти тамамлаган сонъ кыскаяклыды бала шактан эткен мырады Дагестаннынъ патшалык университетининъ юридический факультетине аькеледи. Юрист кесписин байырлаган Асиет Союновна оьз ис аьрекетин Ногай районындагы РАПО-да юрист-консульты болып баслайды. Суд пан байланысы РАПО-дынъ ис коллективи оны халк судында халк заседатели этип сайлавыннан басланды. Коьп кетпей, юрист кесписин юрек шакырувы ман сайлаган кыскаяклыды халк судьяларын сайлав бойынша законына туьрленислер киритилуьви мен Дагестанда биринши кере Ногай районынынъ нарсудына халк судьясы этип 10 йыл болжалына сайлайдылар. Алдын судьялар яшавшылар ман 5 йыл болжалына сайланатаган болганлар.
Асиет Союновна 2001-нши йылдан алып мировой судья аьрекетин етимисли бардырады. Соьйтип, ол коьплеген йыллар бойы оьзининъ суьйген исинде аьдилликти, акыйкатлыкты яклап келуьви мен, куллыгына яваплы каравы ман халк арасында сый-абырай казанган.
Менимше, аьдем яшавда кайсы ис пен каьрлесе де, бириншилей, кесписин суьймеге эм ога тапшырылган исин йогары дережеде ийги этип толтырмага шалыспага керек. Аьдемлерге суд кесуьв – ол бек авыр ис. Судья болар уьшин аьдем акыллы, каьмбил, аьдемлерди тынълавда шыдамлы болувы ман, аьдиллик, акылбалык, законды ийги билуьви эм оны тийисли кулланып болувы ман, аьдемшилик эм усташа соьйлеп билуьв сапатлары ман баскаланмага керек. Сол баьри сапатлары да Асиет Союновнага келисли.
Неше йыллар бойы ол оьзининъ савлай янын эм заманынынъ коьбисин суьйген ис аьрекетине багыслап келеди. Суьйген аьрекетинъде уьстинликке етисуьв – сол тувылма аьдем уьшин уьйкен наьсип! Онынъ этип келетаган кыйыны эли, халкы ман белгиленмей калмады. Коьпйыллык иси эм судебный участоктынъ исин йогары уйгынлавы уьшин 2014-нши йылда ол «Россияда суд реформасына – 150 йыл» деген медалине, 2016-ншы йыл ис аьрекетиндеги бийик коьрсетимлери, минсиз иси уьшин Разылык хатына тийисли этилген.
Мине коьп йыллар онынъ етекшилиги астында татым ис коллективи де уьстинликли ислеп келеди. Ол оьз ис йолдаслары акында уьйкен йылувлык пан атанады. Асиет Союновнадынъ белгилеви мен, олардынъ аьр кайсысы да оьз ис борышларын намыслы, яваплы эм йогары дережеде толтырмага шалысадылар, айтпага, олар: судьядынъ коьмекшиси Н.Эспергенова, суд секретари М.Дукеева, суд йыйынынынъ секретари С.Саитова, курьер Г.Аликеева боладылар, тазалыкты туттырувшы З.Койбакова.
Асиет Союновнады эм онынъ кыскаяклылардан туьзилген ис коллективин келеятырган Хатын-кызлар байрамы ман кутлай келип, законга куллык этуьв аьрекетлеринде янъы кеспилик етимислерин, уьстинликлерди, ден савлыкты, онъайлыкты йорайман.
Г.Нурдинова.
Суьвретте: Асиет Саитова.