Октябрь айдынъ аьр уьшинши каты куьнинде элимиздинъ йол хозяйствосынынъ куллыкшылары оьзлерининъ ис байрамын йолыгадылар. Аьлиги заманды автомобиль йолларсыз коьз алдына келтируьв кыйынлы, неге десе йоллар ман биз ювык эм узак авыл-калаларга, оьз кардаш-тувганларымызга, той-яхшылыкларга катнаймыз. Сол йолларды курув, ярастырув эм канагатлав уьстинде хыйлы аьдемлер куллык этедилер. Йоллар – кайсы бир патшалыктынъ да инфраструктурасынынъ энъ маьнели кесеги.
Буьгуьнлерде элимиздинъ йол хозяйство тармагында 3 мынънан артык учреждениелер эм 750 мынъга ювык аьдемлер ис аьрекетин бардырадылар. Олардынъ куллыгы айлак та маьнели. Автомобиль йолларынынъ аьллери мен ортак бир россиялык эм халклар ара экономикалык кенълиги, солай ок россия регионларын, районлары ман авыл ерлерин оьрлентуьв бойынша яваплы программалар ман проектлерди яшавга шыгарув тар байланыслы.
Ызгы йылларда Ногай районындагы автомобиль йолларын капиталлык ярастырув яктан хыйлы куллыклар этилинип келеди. Айтпага, Терекли-Мектеб – Бораншы аралыгындагы автомобиль йолынынъ 30 шакырымына, Кизляр – Терекли-Мектеб автойолынынъ 10 шакырымына, Терекли-Мектеб – Нариман автойолынынъ 4 шакырымына янъыдан асфальт-бетон тоьселген. Район орталыгынынъ Г.Аджигельдиев, Аталык согысы, Орджоникидзе эм М.Отаров (узынлыгы 1,6 шакырым), Н.Эсмухамбетов, С.Капаев, Ф.Капельгородский атындагы, Кумлинский орам йоллары да сонъгы заманларда ярастырылып, асфальт кебине айландырылганлар. Аьли де быйыл эм келеектеги йылларда да Терекли-Мектеб, баска авыллардынъ орам йолларына да ярастырув ислери этилинип бараяк.
Буьгуьнлерде район йол куллыкшылары Калинин мен Ленин авыллары арасындагы автойолды ярастырадылар. Мунда аьли автогрейдер машинисти Хайрулла Нуков йолга балшык уьйип, сонынъ уьстин тегислеп куллык этеди. «Ногай ДЭП-29» организациясынынъ ис ветераны, айтувлы водитель, Дагестан Республикасынынъ ат казанган коьлик куллыкшысы Эсмурза Дельянов бу йолдынъ уьстине оьзининъ юк тасувшы автомашинасы ман гравий тасын аькелип тоьгуьвде куллык этеек. Эсмурза мунда 35 йыл таймастан ислейди. Ол соны ман бирге ясларга йол куллыгына алал болмага ийги коьрим болады, солай ок олардынъ сулыплы насихатшысы деп саналады.
М.Юнусов.
Суьвретте: автогрейдер машинисти Хайрулла Нуков эм ис ветераны Эсмурза Дельянов.
