Янъыларда Кизляр районынынъ Кохановка авылында болып оьткен авыр йол-коьлик катеси республикамыздынъ ямагатын навасызландырмай болмады. Сонынъ сырагысында 8 аьдемнинъ яшавы кыскартылды, бир неше аьдемлер яраланып каладынъ больницасына туьскенлер. Айлак та бек сондай баьле-каза ман байланыста Дагестан Аькимбасы Сергей Меликов тынышсызланды эм сол ок куьн ян бергенлердинъ кардаш-тувганларына кайрыгувын билдирди. Соны ман бирге республика етекшиси бу катеден тура оьз ойын айтпага амалсыз болды.

Мен сол куьн йол уьстинде кыянатлык эткен, йол юрисининъ йорыгын бузган карактынъ куьнасиннен тура бир куьнасиз аьдемлердинъ яшавы уьзилгениннен себеп Дагестан Аькимбасынынъ ян авырувын эм ашувланувын анълайман. Сергей Меликов сондай кыянатшыларды аьдем оьлтируьвшилер деп дуп-дурыс атайды. Ондайларга ушыны ман да йол уьстинде юрген бандитлер демеге керек. Сол сырага йол уьстине ювырып шыгатаган айванлардынъ иелерин де киргистпеге болады. Республика басшысы бу ис бизим йолларда болган эм болатаган тек биринши ис тувыл деп белгилейди. Ол танълагы куьн, йол юрисининъ кавыфсызлыгы, мундай ислер алдын да болганы эм ямагатымыз солардан оьзине тийисли дерис алмайтаганы, сондай аьллерди каты айыпламайтаганы уьшин авара болады. Сондай ислер санына тек йолдагы кателер тувыл, кокысты карсы келген ерге таслайтаганлар, балалар майданларындагы алатлардынъ гайкаларын сувырып шыгаратаганлар, малларын орамларга, парк ишине айдайтаганлар эм сондай коьп баска ислерди этетаганлар да киредилер.
Сергей Меликов сондай ислер уьшин босына кайгырмайды, неге десе ямагаттынъ, сонынъ аьр бир ваькилининъ тоьгеректе болаяткан оьзгерислерге эм ислерге каравы ман сав республикадынъ бактысы байланыслы. «Биз баьримиз де кайдай республикада яшамага суьетаганымызды: орман законлары ман ма яде аьдем анъламлары ман ма, «мен баьтирге ким батар» деген кодекс пен ме яде акылбалык болып, оьз аьелимиз, уьйимиз, республикамыз уьшин яваплыкты мойынымызга алып яшамага суьетаганымызды оьзимиз уьшин дурыс шешпеге борышлымыз», – деп белгилеген Дагестан Аькимбасы.
Дурысында да, бу маьселеди шешпей, биз алдыга юрмеге, республикады армаган оьрлендирмеге болмаякпыз.
М.Юнусов.