Йыл сайын караша айында полиция куллыкшылары оьз кеспи байрамын карсы аладылар. Сол куьн олардынъ исиндеги уьстинликлери, етимислери белгиленип, кайбирисине ийги йоравлар айтылынады. Кашан да, полицейскийлердинъ куллыгы кыйын, олар ямагаттынъ кавыфсызлыгын канагатлав аьрекетинде оьз куьшлерин салып, янларын да курманлык этедилер.
Полиция лейтенанты Салим Баадин улы Бекбулатов Россия МВД Ногай районы бойынша иш ислер боьлигинде ислегенли янъы бир йыл толды. Ол Терекли-Мектеб авылында участковый-уполномоченный болып ислейди. Бу авылда тувып-оьскен, мектебти битирген, сога коьре коьп аьдемлер ога таныс, бу зат онынъ куллыгына енъиллик этеди.
Салим Краснодар каласында Россия МВД университетинде «участковый-уполномоченный» кеспи бойынша окыган. Краснодарда окыган йылларда Салим тенълери мен бирге 2017-нши йыл Сочиде футбол бойынша кубок конфедерациясында, 2018-нши йыл футбол бойынша дуныя чемпионатында, яслар фестивалинде ямагат кавыфсызлыгын канагатлавда катнаскан. Сол мерекелерде катнасканы уьшин Салим Бекбулатовка Россия Президенти Владимир Путин атыннан разылык хатлар тапшырылган. Аьлиги заманда да оьз исинде етимислерге етискени уьшин Салим МВД атыннан эм ислейтаган боьлик етекшилеви атыннан Сый грамоталар ман савгаланган.
– Куллык кыйын болса да, кызыклы. Туьрли яшав аьллерине туьскен инсанлар ман ислеймиз, туьрли маьселели соравлар шешемиз. Терроризмге карсы хабарласувлар озгарамыз, боьтен де ясларды сол яман заттан саклав ниет пен аьрекет этемиз. Коронавирус пан байланыста пандемия заманында керексинетаган аьеллерге, савлай боьлигимиз бен биргелесип, коьмек эттик. Сол да бизим куллыгымыздынъ маьнели кесеги, неге десе аьдемлер кыйналганда, полицияга сеним мен келедилер. Йылдынъ ызында халк алдында эткен куллыкларымыз акында эсап беремиз, – деп хабарлайды Салим Бекбулатов.
Аьли де ястынъ алдында коьп йоллар бар, сол йоллар ман бара берип, Салим исинде сулыбын да, аьдемшилик касиетлерин де арттырар деп шекленмеймен. Келеяткан кеспи байрам ман кутлап, яска исинде уьстинликлер, яшавында ийгиликлер йорайман.
Г.Бекмуратова.
Суьвретте: С.Бекбулатов.
