Белгили аьдемлердинъ яшавында, онынъ кишкей сокпагы кенъ яратувшылык йолына айланувына, Кудай усындырган зейинлиги эм талабыннан оьзге, себебин тийгисткен баска затлар да болады. Ол кайдай да бир йолыгыслар, биревдинъ берген маслагаты, насихаты болмага болады.
Сраждин Батыров атындагы балалар саниятлар мектебинде янъыларда белгили россия композиторы, йырлавшы эм музыкант, КЧР-нынъ ат казанган саниятлар аьрекетшиси Ренат Джанибеков пан йолыгыс озды. Зейинли яс йырлавшы ман йолыгыска саниятлар мектебининъ тербияланувшылары эм окытувшылар йыйылдылар. Бас деп С.Батыров атындагы саниятлар мектебининъ етекшиси Анвар Аджибаев келген конактынъ, онынъ баслапкы яратувшылык йолы акында балаларга айтты. Сонъ Ренат Джанибеков балалар алдына шыгып, оларга хор саниятынынъ, вокалдынъ, композиторлардынъ эм коьп баска анъ ман байланыслы болган затлар акында кызыклы хабарлады. Яс композитор домбырада ойнап, Шал-Кийиз Тиленши увылынынъ соьзлерине келистирип, оьзи язган анъды шалды. Сонъ ол пианинода ойнап, балаларга орыс эм английс тиллеринде занъыраган таза тавысы ман йырлар йырлады. Солай ок Ренат Джанибеков келеекте оьз бактыларын анъ ман байланыстыраяк балаларга пайдалы маслагатлар берди.
– Балалар, эгер сиз анъ язбага суьйсенъиз, бир де соны этип болмаспан, меним сол иске керекли кадер билимим йок деп ойламанъыз. Сол буршав берген ойлардан босатылынып, алдыга йигерли абыт алынъыз. Биревге де йорык билим берилмейди, ойлап шыгарар уьшин аваслык керек. Сиз баьринъиз де келеекте музыкантлар болмассыз, биревлеринъиз инженер, экиншилер – врач, баскалары окытувшы болмага суьер, ама саниятлар мектебинде озгарган йыллар аьр биринъиздинъ эсинъизде калар. Мунда алган билимлер де сизге керегер. Аьли мен келеекте бактыларын анъ ман байланыстыраякларга маслагат берейим, музыкант уьшин бек маьнели йигерли болув. Сонынъ уьшин оьз алдынъызга йогары мыратлар салмага, маьнели исти басламага коркпанъыз, – деди Ренат Джанибеков.
Саниятлар мектебиндеги бу куьнги йолыгыс бек йылы аьлде оьтти, балалар келген конак пан оьзи мен тенълестей аьллестилер, ога оьзлерин кызыксындырган соравлар бердилер.
Ренат Джанибековка биз аьлемет йолыгыс уьшин оьз разылыгымызды билдиремиз эм ога аьли де яратувшылык уьстинликлер йораймыз.
Н.Кожаева.
Суьвретте: йолыгыстан коьринис.
Янды канатландырган йолыгыс
![](https://golosstepi.ru/wp-content/uploads/sites/7/sites/7/2022/10/nuriyat1-26-sentyabr-1024x768.jpg)