Россия куьнине багысланган район шатраш турнири янъыларда Бораншы авылынынъ маданият уьйинде озды. Турнирди Тимур Елакаев уйгынлады. Базласларда Терекли-Мектеб, Червленные Буруны, Карагас эм Бораншы авылларыннан баьриси 26 окувшы катнасты. Шарады Бораншы авылынынъ маданият уьйининъ етекшиси Альфия Боршакаева ашып, йыйылганларды Россиядынъ маьнели байрамларынынъ бириси – Россия куьни мен кутлап, балаларга ойында уьстинликлер йорады.
– Аьр бир аьдемге Тувган эли яшаган, окыйтаган эм ислейтаган ерлериннен басланады. Ногай районынынъ, Дагестаннынъ эм Россиядынъ аьлигиси мен келеектегиси бизим баьримиз салган куьшимизге, яратувшылык эм интеллектуальлик етимислеримизге бойсынады. Мен сизге бу куьнги ойынларда эм коьп баска базласларда енъуьвлерди эм уьстинликлерди йорайман, – деди А.Боршакаева.
Ойнавшыларга белгиди шахматлар бойынша тренери Арслан Елакаев берди. Онынъ айтувы ман, язгы таркавлар куьни болса да, окувшылар шатраш бойынша оьзининъ сулыбын оьстируьв уьстинде ислейдилер. Бу куьнлерде олар шатраш борышларын шешедилер, онлайн турнирлерде катнасадылар. Солай ок ол оьзининъ тербияланувшысы А.Джанибеков атындагы мектебининъ окувшысы Аман Саитовтынъ шатраш бойынша етискен уьстинликлерин белгиледи. Окувшы озган 2020-ншы йыл Махачкалада оьткен Шахматлар бойынша Дагестан чемпионатында 12 ясына дейим балалар сырасында енъуьвши болган. Сол уьстинликке аз санлы халкымыздынъ кишкей ваькили етискени бизге куьез эм оьктемлик. Бу йыл да ол Махачкалада 22-нши июньнен алып 1-нши июльге дейим озгарылаяк Шахматлар бойынша Дагестан чемпионаты -2021 базласларда ортакшылык этеди. Бу куьнлерде Аман Ставрополь крайындагы Светлоград каласында озган базласларда уьйкенлер сырасында 1-нши орынды бийледи. Арслан Елакаев уьстимиздеги йыл Савдуныялык шахматлар куьнине 20-ншы июльде районымызда уьйкенлер уьшин шатраш турнирин озгармага ниети мен боьлисти. Турнирде балалардынъ арасындагы куьшли деген шатраш ойнавшысы катнасаяк.
Бораншы авылында озган шатраш базласларына коьшейик. Мунда озгарылган 7 кезек бойынша турнирдинъ чемпионы Червленные Буруны авылыннан Тамирлан Аманкаев болды. 5-9-ншы классларынынъ сырасында Бораншы авылыннан Ислам Боршакаев 2-нши, Терекли-Мектеб авылыннан Чингиз Юмартов 3-нши орынларды бийледилер.
5-9-ншы класста окыган кызлар сырасында 1-нши орынга Карагас авылыннан Хадижа Амангельдиева, 2-нши орынга Бораншы авылыннан Аделия Боршакаева, 3-нши орынга Червленные Буруны авылыннан Юлдуз Мусаурова тийисли болдылар.
1-4-нши классларда окыган кеделер сырасында Эмирлан Саитов (Терекли-Мектеб авылы) – 1-нши, Муслим Боршакаев (Бораншы авылы) – 2-нши, Муслим Киреев (Червленные Буруны авылы) 3-нши орынларга тийисли болдылар.
1-4-нши классларда окыган кызлар сырасында Терекли-Мектеб авылыннан Зейнаб Абидова – 1-нши, Червленные Буруны авылыннан Альмира Киреева 2-нши орынды, Терекли-Мектеб авылыннан Медина Менглиязова 3-нши орынларды казандылар.
Шарадынъ енъуьвшилери кубоклар эм Сый грамоталар ман савгаландылар. Арслан Елакаев белгилегенлей, шахматлар Ногай районында, спорт кеби эсабында, коьлем болады, солай ок яс шахмат ойнавшылардынъ орта оьлшеми оьседи. Балаларга етискен уьстинликлерде токтамай, оьзлерининъ алдында йогары мыратлар салганын йораймыз.
Н.Кожаева.
Суьвретлерде: шатраш базласлардан коьринис; турнир чемпионы Т.Аманкаев.
