Янъыларда «Единая Россия» Савлайроссиялык партиясынынъ Дагестан регионаллык боьлигининъ санындагы Ногай район боьлигининъ конференциясы болып оьткен. Сонынъ делегатлары «Единая Россия» партиясынынъ Ногай район боьлигининъ борышлары эм партиядынъ ерли боьлигининъ секретари акында соравларды ойласып караганлар.

Конференциядынъ куьн йосыгындагы биринши соравы бойынша «Единая Россия» партиясынынъ Ногай район боьлигининъ толтырувшы секретари Амирхан Межитов доклады ман шыгып соьйлеген. Докладшыдынъ соьзине коьре, ямагат аьллерининъ тез туьрленуьви аьсеринде ерли кадрларды оьстируьв эм тербиялав соравы оьткир кепте турады. Хайырлы кепте куллык этуьв уьшин боьликтинъ партия активининъ ис йорыгы район яшавшыларынынъ бас соравларына келисли болып келмеге тийисли. Докладшыдынъ белгилеви мен, сонынъ уьшин иске билимли профессионаллы, куллыктынъ аьлиги замандагы йорыкларын кулланып эм аьдемлердинъ маьселелерин шешип болатаган етекшилерди киргистуьв керегеди.
Конференциядынъ экинши соравы – партиядынъ ерли боьлигининъ секретари Мухтарбий Аджековтынъ оькимет куллыгына кетуьви мен байланыста ол оьзин секретарьден босатув акында аьризе берген эм сол себептен онынъ орынына партиядынъ район боьлигининъ янъы секретарин сайлав ман байланыслы эди. Сога коьре конференция делегатлары альтернативли йосык пан коьрсетилген эки кандидат арасыннан «Единая Россия» партиясынынъ район боьлигининъ секретари этип Ногай районынынъ аьлиги аькимбасы Джамалутдин Эсиргеповты сайладылар.
Оьзининъ соьзинде янъы сайланган район партия боьлигининъ секретари ога этилинген сеними уьшин делегатларга разылыгын билдирди. «Бизим куллыгымызда энъ маьнелиси – ол тыпак эм профессионаллы команда. Биз ис аьрекетимизди республикадагы йолдасларымыз эм савлайы Россия ман бирге армаган юритеекпиз», – деди Джамалутдин Эсиргепов.
Соьзининъ ызында партиядынъ район боьлигининъ янъы сайланган секретари партия агзалары алдында туратаган борышлар акында айтты. Ол партия куллыгын белсенлетуьв, социаллык маьнелиги болган соравлардынъ шешилуьви эм программалардынъ яшавга шыгарылувы артыннан партия тергевин токтастырувдынъ маьнелигин белгиледи.
Конференциядынъ исинде «Единая Россия» партиясынынъ Дагестан регионаллык толтырувшы боьлигининъ етекшисининъ орынбасарлары А.Трошина ман М.Юнусов катнастылар.
Бизим хабаршы.
Суьвретте: конференция аьсеринде.