Иш ислер министерствосы Россия гражданлары янъы паспортлар алув эм авыстырув бойынша янъы административли регламентин куьшине киргизген.

Сол белгиленген регламентке коьре, паспортка салынатаган суьвретке уьйкен маьне берилип каралады. Сол суьврет кайдай болмага керегининъ оьз йорыклары да бар. Соларда аьдемнинъ оьзининъ суьвретине бир бояк та косылмага керек тувыл. Коьздинъ туьсин туьрлендиретаган алатларды да кулланып, суьвретке туьспеге ярамайды. Эгер аьдем дайым коьзилдирик салып юретаган болса, сол коьзилдириктинъ сиселери тек ак туьсли болмага эм бетти яппага ярамайды. Солай ок, паспорт алаяктан алдын тоьленетаган патшалык акшасынынъ да тоьленуьвининъ эм янъы паспорт алув уьшин язылатаган аьризединъ кеби де туьрленген. Янъы паспорт алаяк заман созылатаган болса, сол кесек заманга аьдемнинъ менлигин коьрсететаган удостоверение де бериледи.
Сол янъы киритилген йорыкларга коьре, паспортка суьвретке туьсуьвдинъ энъ маьнелиси – туьрли ис орынларда кийилетаган кийимлер мен туьспеге ярамайды.
Аьдемнинъ паспортындагы суьврети оьзининъ ясына да келисли болмага тийисли, сол суьврет ак-кара яде туьрли туьсли де болмага болады. Ол суьвретте тувра эм ябык авызы ман карамага керек, коьзди де шаш пан ябув дурыс тувыл. Иекти ябатаган кийимлер де кийип суьвретке туьспеге ярамайды. Баста явлык болмага да ярайды, эгер сол бетти яппайтаган болса.
Паспортка суьвретке туьскенде артында туьрли туьсли бир зат та болмага керек тувыл.
Паспортты авыстырар уьшин (сол болжал келгенде) МФЦ-да янъы паспорт алаягы яде барын авыстыраягы акында Россия гражданлары аьризе язадылар эм эки суьврет бередилер. Эгер сизге йогарыда айтылган, кесек заманга менлигинъизди коьрсеткен удостоверение керек болса, уьшинши суьвретти де аькелесиз.
Патшалык буйымлар сайтында янъы паспорт алаяк яде авыстыраяк аьдемлер аьризе калдырганнан сонъ, оларды шакыртадылар, эгер олар сол белгиленген заманга келмеселер, олардынъ янъы паспорт алаяк заманы бир ай узагына созылмага болады.
А.Канлыбаева,
Ногай районы бойынша ОМВД-сынынъ МП тамада инспекторы.