Ногай район аькимбасы Джамалутдин Эсиргепов ДР Халк Йыйынынынъ депутаты Мурзадин Авезов пан бирге Батыр-Мурза авылындагы мектебтинъ янъы меканынынъ курылысын тергеген.

Бу тергев подряд организациясы курылыстынъ планынынъ графигиннен сав бир кварталга кери калганы ман байланыста оьткерилген.
Тергевдинъ сырагысы бойынша подрядчик депутат Мурзадин Авезовты эм муниципалитеттинъ аькимбасы Джамалутдин Эсиргеповты кери калув тайдырылаяк эм объект графикке коьре заманы ман кулланувга берилеек деп сендирген.
2023-нши йылдынъ октябрь айына объект кулланувга берилмеге тийисли. Муниципалитет оьз кезуьви мен подряд организациясынынъ маьселелерин шешуьвге ярдамын этеек эм мектебтинъ меканынынъ курылысы курылыс нормативлери мен келисли кепте план бойынша юритилсин деп курылыс куллыкларын заман-заманы ман тергеп тураяк. Эгер сонда да ис юрмесе, ыхтыяр саклавшы органларына дейим аьризе берилип, баьри тийисли амаллар да коьрилеек.
«Ногай районы уьшин балалар мектебтинъ эски меканыннан янъысына коьшкени айлак та бек маьнели. Бизим балалар ийги аьллерде окымага тийисли. Сол зат районнынъ баска маьселели мектеб меканларына да уьлги болмага керек, – деген Ногай район аькимбасы Джамалутдин Эсиргепов.
Авылда курылып турган мектебтинъ янъы меканы эки шарлаклы эм 100 орынлы болаяк. Мектеб меканы аьлиги замандагы баьри нормаларга да келисетаган муьлк-алат пан канагатланаяк.
Суьвретте: Ногай район аькимбасы Д.Эсиргепов эм ДР Халк Йыйынынынъ депутаты М.Авезов янъы мектеб меканынынъ курылысын тергейдилер.