Тезден Россия Федерациясынынъ баьри мектеблери де эсиклерин кенъ ашып, оьз окувшыларын, олар ман бирге биринши кере мектеб эсигин ашатаганларды да хош коьрип алады.

Ызгы заманларда янъы окув йылы басланаякта бизим элимиз бойынша «Окувга бармага оьз ярдамынъды эт» деген саваплык акция озгарылады. Бу акцияда мырады бар баьри организациялар да катнаспага боладылар. Акциядынъ бас мырады – кыйынлы, колайсыз аьлде калган аьеллердинъ балаларына мектебке бармага ярдамласув, олай дегенимиз, оларга баьри керекли затларды алып беруьв. Бу акцияда биз де – Ногай районы бойынша Россия МВД боьлигининъ куллыкшылары да катнасамыз эм оьз ярдамымызды этип, ясы етпегенлерди тийисли йорыкларды бузбай, ямагатка карсылыкты этпеге ярамайтаганы акында хабарласувлар юритемиз.
Уьстимиздеги йылдынъ кырк кийик айынынъ биринши куьнинде Ногай район билимлендируьв тармагына окувга 3300 бала бараяк. Сол саннан онлаган аьеллер кыйынлы материаллык аьллерде, сонынъ уьшин район яшавшыларына – колларынъыздан келген коьмегинъизди сиз де этпеге боласыз, – деген шакырув этемиз. Эткен кишкей саваплыгынъыз мынъ кере артып кайтар.
Сыйлы ата-аналар, сизинъ эсинъизге саламыз: сиз де оьз балаларынъызга айтып турынъыз, ямагат ерлерде оьзлерин юритип болув акында. Кешки шакларда, балалар янларында уьйкен аьдемлер болмай, кырда юрмесинлер. Оьз балаларынъыз бан йол юрис йорыклар акында соьйленъиз.
Саклык – сизинъ савлыгынъызды саклавшы.
К.Акмурзаева, Ногай районы бойынша Россия ОМВД-сынынъ ПДН эм ОУУП ПДН куьбининъ тамада инспекторы, полиция майоры