Оьткен юма Терекли-Мектеб авылында оьз алдына янъы район ямагат организациясын туьзуьв мен байланыста Ногай районнынъ ямагат активистлерининъ йыйыны болып оьткен.

Йыйында Терекли-Мектеб, Калинин, Куьнбатар, Карагас эм баска авыллардынъ ямагат ваькиллери катнастылар.
Бу ямагат организациясын туьзуьв ниет оьз-оьзиннен тувмаган. Сонынъ бас мыратлары деп ызгы йылларда район ерлеринде табиат аьллери айлак та осалланувы ман байланыста отлакларды, эгин кырларды, район табиат байлыклары болып саналатаган Терекли-Мектеб авылынынъ Ф.Капельгородский атындагы паркын, Червленные Буруны авылында арша орманлыгын, район ериндеги орман йолакларын саклав эм оьрлентуьв, гражданлар баславларын яде социаллык-маьнели программаларды эм проектлерди яшавга шыгарув тармагында патшалык соравларды шешуьвде катнасув, потребительлер ыхтыярларын коршалав эм сондай баска туьрли ортак кызыксынувларын яклав болады.
Янъы туьзилген ямагат организациясы оьз аьрекетин Россия Федерациясынынъ эм Дагестан Республикасынынъ законлары ман келисли кепте бардырмага ниетленеди.
Йыйында район орталыгынынъ ямагат аьрекетшилери Арслан Бекмурзаев, Балманбет Рахмедов, София Арсланова, Асият Саитова, Саид Сатыров, Тахир Абдуразаков, Карагастан Темирхан Сатыров, Калининнен Самавдин Беккишиев, «Единая Россия» партиясыннан келеяткан сайлавларга кандидат Динислам Сабутов эм баскалар ортакшылык эттилер эм оьз ойлары ман боьлистилер.
Йыйыннынъ куьн йосыгы бойынша янъы район ямагат организациясы туьзилди, сонынъ Уставы ойласылды эм кабыл этилинди. Янъы туьзилген ямагат организациясынынъ председатели этилинип Терекли-Мектеб авыл яшавшысы Саид Сатыров беркитилди.
М.Юнусов.