Бу йылдынъ курал айынынъ 22-нши куьнинде Д.Шихмурзаев атындагы орта мектебинде выпускниклерге ызгы занъ согылды. Язгы куьннинъ коьзи оьзининъ йылувлыгын мол тоьгип, шатлыклы байрамга коьнъил йылувлыгын коспага шалысады. Мектебтинъ азбарын шакырылган конаклар, колларында гуьл байламлары ман окувшылар, окытувшылар, балаларын янъы яшав йолына салмага келген ата-аналар, туьрли туьсли шарлар байрамды ярасыкка толтырадылар. Ама олардынъ кайсысынынъ юзинде аз мунъшылык та барын сезбей болмайсынъ, неге десе тувган мектеби, окытувшылары ман аманласув – ол бек авыр.
Выпускниклерди йолга салув, оларга ызгы занъ согылув байрамды мектеб етекшисининъ тербиялав иси бойынша орынбасары Ф.Абдунасова юритти.
Шатлыклы байрамды кутлав соьзи мен мектеб етекшиси К.Нукаева, «село Кумли» СП МО аькимбасы С.Елманбетова, выпускниклерин йолга салмага сыйлы конаклар «Ногайский район» МР ваькиллери, айтпага, РФ ат казанган маданият куллыкшысы Н.Муталлапова, Ногай районнынъ Хатын-кызлар советининъ председатели А.Манкаева йылы йоравларын айтып кеттилер. Соьйлегенлердинъ аьр бириси окувшыларга яшавда уьйкен уьстинликлер йорап, билим алган мектеби, авыл яшавы бойынша коскан уьлислерин, етимислерин белгилеп, выпускниклерге туьрли шаралар бойынша коьрсеткен билимлери уьшин, спорт ярысларындагы уьстинликлери уьшин Сый грамоталар тапшырдылар. Оннан сонъ 9-ншы эм 11-нши класс выпускниклери де разылык соьзлерин мектебтинъ туьрли дерислери бойынша окытувшыларына, оьзлерининъ класс етекшилерине эм биринши окытувшыларына багысладылар. Мектеб выпускниклерин кутламага соьз выпускниклердинъ биринши окытувшылары атыннан А.Нурадиловага, Ф.Менлиалиевага, класс етекшилери атыннан С.Аджигельдиевага, А.Нурадиловага, солай болып ата-аналар атыннан Р.Толакаевке, Б.Сангишиевага берилди. Мектеб выпускниклерин Д.Шихмурзаев атындагы мектебининъ шынты джентльменлер клубынынъ катнасувшылары, 5-нши класс окувшылары да кутладылар. Шара программасын йырлар, ятлавлар, солай болып, 9-ншы эм 11-нши класс выпускниклери сонъгы вальс биюви де ярасыкладылар.
Сонъгы дериске ызгы занъды бермеге, сав мектеб йыллар тек йогары белгилерге окып келген, кайсы ерде де алдыда болган 11-нши класс выпускниги З.Дадиевага эм биринши класс окувшысы И.Мустафаевке ыхтыяр берилди.
Аьр бир выпускник алдында маьнели борыш – патшалык сынавлар эм янъы яшав йолы. Сол сынавларды олар енъил оьтип, кайсы ойлаган мыратларын да яшавга шыгарып келеегине сенемиз. Яхшы йолга, выпускник!
Г.Нурдинова.
Суьвретте: шарадан коьринис.
