Мусылман кыскаяклыды онынъ касиетлери, танълыгы, сеними, дайым да коьмек этпеге аьзирлиги, уялшанълыгы, оьктемсизлиги, юрек тазалыгы ярасыклайды. Дуныядагы аьр бир аьдем шынты мусылман кыскаяклыдай болса, аьдемлердинъ бир-бирине ниети ак эм таза болса, дуныя эм яшав аьлемет рахатлы эм тыныш болар эди. Хатын-кызларга туьз йолын сайламага ярдам этер ниет пен, оьз аьрекетин бардырады Махачкаладагы «Гьидаят» (насихат) хатынлар орталыгынынъ Терекли-Мектебтеги филиалынынъ етекшиси Амина Янгазиева. Хатынлар орталыгынынъ филиалын кыскаяклы етекшилегенли айлак аз заман болса да, онынъ куьш салувы ман аз зат этилмеген.

Йогарыда туьз йолын сайламага ярдам этер ниет пен деп айтувымыз, орталыкта онынъ куллыкшыларынынъ коьмеги мен хатынлар намаз кылып уьйренедилер, аьр бир юма сонъгы куьн мунда кыскаяклыларга лекциялар окылады. Тагы да Махачкаладагы «Гьидаят» хатынлар орталыгынынъ Терекли-Мектебтеги филиалында Shimmer студиясы аьрекет этеди. Мунда кызлар 1-нши класстан алып юрмеге боладылар. Студияда балаларга туьрли мастер-класслар коьрсетилинеди. Оннан оьзгелей, «Гьидаят» хатынлар орталыгынынъ Терекли-Мектебтеги филиалынынъ куллыкшыларынынъ аьли де коьп мыратлары бар. Олар кыскаяклылардынъ тек ян ярасыклыгы тувыл, тыскы ярасыклыгы акында да каьр шегедилер. Куллыкшылар хатынлар орталыгынынъ филиалында туьрли кабинетлер ашпага ниетленедилер.
Хатынлар орталыгынынъ филиалынынъ куллыкшылары Интернет аркалы да аьрекет юритедилер, олар туьрли куьплерин туьзгенлер. Сонда аьр бир аваслыгы болган хатын катнаспага эм дин бойынша оны кызыксындырган соравларга явап алмага болады. Амина Сейпуллаевнадынъ айтувы ман, Пайхамбар (Алладан ога салам эм салават) 1400 йылдынъ артында бизге аьр бир соравга явап калдырган эм оларды биз окып, уьйренсек эм оларга таянып яшасак, биз дайым туьз йолында болармыз.
Пайхамбардынъ (Алладан ога салам эм салават) коьрсеткен йолын сайлап, ак ниетли аьрекетти бардырар уьшин, Амина Янгазиева Терекли-Мектебтеги Абу-Ханифа медресесинде, сонъ Махачкаладагы Мухаммад-Ариф атындагы Дагестан ислам университетининъ Ханафий филиалында билим алган. Ис аьрекетин болса, Кизляр каласындагы индустриаллык-педагогикалык техникумды окып кутарып, Шешен Республикасынынъ Шелков районынынъ Узловая станицасында окытувшы болып баслаган. Кыскаяклы асылы ман Ногай районынынъ Карасу авылыннан. Ол, уьйинде аькие бала болып, ата-анасынынъ, аданасы эм абасынынъ суьйимине коьмилип оьскен. Сога коьре болартагы бала заманнан алып, суьйим эм каьр шегуьв коьрген кыскаяклы тоьгеректегилерге де оьз суьйимин аямай савкатлайды. Оьзининъ уьш баласын ак ниетли, туьз йолын сайлагандай этип, ийги тербия бермеге шалысады.
Хатын-кызлар байрамы алдында биз «Гьидаят» хатынлар орталыгынынъ Терекли-Мектебтеги филиалынынъ баьри куллыкшыларын эм олардынъ етекшиси Амина Янгазиевады байрам ман кутлаймыз. Наьсип, онъайлык эм берк иманды йораймыз.
Н.Кожаева.
Суьвретте: А.Янгазиева.