Эр киси аьр заманда да Аталыкты коршалавшы болган. Неше йигитлеримиз де дав майданларда бизим тынышлыгымызды саклав ниет пен янларын бергенлер. Олардынъ кайбирисининъ аты бизге белгили. Донбассты эм Украина ерин националистлерден босатув бойынша оьтип турган спецоперациясында аьскершилеримиз баьтирлик коьрсетедилер, оькинишке, ян бергенлер де бар.
Уьйсалган авылыннан Уллы Аталык согысына кеткенлердинъ коьбиси давдан кайтпадылар. Олардынъ атлары авыл мектебининъ касында орынласкан эстеликке язылган. Биз олардынъ алдында басымызды иемиз. Сол тукымлардынъ арасында Явгайтар Тлековтынъ аты да бар. Онынъ агасы Айтувган Тлеков согыстан кайтып келип, тынышлык яшавды курган. Ясуьйкенимиздинъ тувдыклары буьгуьнлерде Моздок каласынынъ касында орынласкан Кизляр авылында яшайдылар, баскалай бу авылга Бекишюрт деп айтадылар. Меним энем Нуржаат Бекмуратовадынъ анасы кумык миллетли болган, ол да бу авылда яшаган. Бекишюртта Айтувган Тлековтынъ кызы Фатима-абай яшайды. Бу хабарды мага халкымыздынъ белгили ваькили Зухра Казбек кызы Мусаурова айтты, ол оьзи Явгайтар Тлековтынъ немереси болады. Айтувган эм Явгайтар Тлековлардынъ йигитлиги акында буьгуьнлерде де айтылады бизим авылда. Уьйкен нагашаталарынынъ йигерлиги, баьтирлиги немерелерине де коьшкенине буьгуьн биз баьримиз де шайыт болып турымыз, олар Украина ерин нацистлерден босатувда катнасадылар. Беслан Багаудин увылы Лукожев, оьзин йигитлерше коьрсетип, каты согысувлардынъ бирисинде ян берген.
Беслан Кизляр авылында 1999-ншы йылдынъ тамбыз айынынъ 5-нши куьнинде тувган. Тувган авылынынъ орамларында оьскен, ерли мектебти битирген. Лукожевлердинъ аьели бек куллыксуьер, намыслы аьел деп саналады авылда. Бесланды кишкей заманнан шынты эр киси этип оьстиргенлер, ол аьскершилик йолын сайлаганда, аьели макул болды, неге десе олар бас орынга Аталыкты саклавды саладылар. Лукожевлер кайзаманда да авыл еринде озатаган патриотлык акцияларында катнасадылар.
Беслан Лукожев Моздок каласында орынласкан 23511-нши номерли аьскерлер боьлигинде данъклы юзинши бригадасында куллык этетаган эди. Разведка батальонына кимди болса соны алмайтаганы белгили, онда тек сенимли инсанлар ислейдилер. Билимли, йигерли Беслан куллыгын йогары дережеде юритетаган эди эм, Украинага кетпеге туьскенде, бир куьн де ойланмады, тынышлык аькелуьвди яс оьз борышы деп санады. Навруз айынынъ 15-нши куьнинде аьскершилердинъ 214-нши разведка куьбининъ сырасында Беслан тенълери мен Запорожская областининъ Вербовое авылыннан 3 шакырым ерде явдынъ барысын тергеп юргенлер. Бу ерде оларга националистлер батальоны карсы келген. Оьз йолдасларын алдыга йиберип, Беслан яв ман бирме-бир калган эм ян берген. Сондай йигитлик тек йигерли эр киси этпеге болады. 23511-нши номерли аьскерлер боьлигининъ етекшилеви мен контракт службасынынъ ефрейторы Беслан Багаудин увылы Лукожев коьрсеткен йигитлиги уьшин Баьтирлик ордени мен савгаланувга коьрсетилген.
Бесланнынъ бир тамыры – ногай. Буьгуьнлерде соьз миллет акында да тувыл. Буьгуьн соьз бизим йигитлеримиз акында. Кайсы миллетли болса да, кайсы ерден болса да, кайсы тилде соьйлесе де, оларда бир Ана – Россия. Сол зат бек маьнели. Буьгуьн бизим аьскершилеримиз йигитлерше коьрсетедилер оьзлерин спецоперация барысында. Биз олар ман оьктемсиймиз эм уьйге аман кайтканын йораймыз.
Г.Бекмуратова.
Суьвретте: Б.Лукожев.
