Кырк кийик айынынъ 1-нши куьнинде Тарумов районында биринши занъ согылды.
Бу йыл ишинде 18 ортак билимлендируьв ошакларында 5150 окувшылары окув йылын басладылар, сонынъ ишинде 585 балалар биринши класска бардылар.

Билим куьнинде капиталлык ярастырувы бойынша патшалык программасына кирген Тарумов районынынъ Новодмитриевка авылында район аькимбасы Александр Зимин болып кетти.
Окувшылар, окытувшылар эм ата-аналар ман суьйиништи боьлмеге Дагестан Оькиметининъ Тарумов районы бойынша кураторы Магомед Шапиев, «Единая Россия» партиясынынъ Тарумов ерли боьлигининъ толтырувшы секретари Муслим Ахмедов, район администрациясынынъ туризм, спорт, физическая культура, яслар ислери бойынша боьлигининъ етекшиси Айдемир Дамадаев те келген эдилер. Шарадынъ барысында Россия гимни ман Россия Федерациясынынъ байрагын коьтермеге ыхтыяр 9-ншы класс окувшысы Темирбек Манаповка берилди. Окувшыларга, педагогларга кутлав соьзи мен Тарумов район аькимбасы Александр Зимин шыгып соьйледи. Ол оьз соьзинде келген конакларга уьйкен разылыгын билдирди. – Дуныяды аьлиги йогары технологиялары бийлеп алган заманда, оьсип келеятырган несилге оьзлериндеги билим оьлшемин толы кепте яшавга шыгарувды эм ис аьрекетинде уьстинликлерге етисуьвди канагатлав бас борышларымыздынъ бириси болады. Биз мектеблеримизди XXI оьмирининъ окув ошаклары этип коьремиз эм оларды янъыртувга эм аьлиги заманга келисли ярастырувга ийги янъы технологияларды эм энъ сапатлы билимлендируьв программаларды киргистуьвге уьйкен куьш салып келемиз, – деди.
Оьз кутлав соьзлеринде Магомед Шапиев те эдаплы тербиялавдынъ эм билимлендируьвдинъ маьнелиги акында айтты. Оннан сонъ оьз кутлав соьзлери мен мектеб етекшиси Гульмира Манапова шыгып соьйледи. Ол район администрациясынынъ специалистлерине, окытувшыларга, ата-аналарга ярастырув ислери юритилуьвде эткен ярдамы уьшин разылыгын билдирди. Мектебке янъы алатлары алынып басланганы, ювык арада муьлк те янъыдан алынаягы акында айтты. Биринши класска барган эм 11-нши класс окувшылары да оьз кутлав соьзлерин айтып кеттилер.
Оннан сонъ конаклар мектебтинъ ишин карап шыктылар. Окытувшылар ман хабарладылар, биринши класска барган окувшылар ман суьвретке туьстилер.
– Мектеб – аьлемет эм кайтарылгысыз, суьйиниш эм кайгылар ман, етимислер эм етиспевликлер мен, янъы ашылувлар эм куьтпеген йолыгыслар ман толган савлай яшав. Бизим мектебимизде сол яшав ман бир аьлдей болып окувшылар, окытувшылар эм ата-аналар (солардынъ арасында бизде окыган окувшыларымыз да бар) эм мектебимиздинъ онъайлыгы акында каьр шегетаганлар яшап келедилер. Келеекте де мектебимиздинъ саьбийлеримиздинъ оьнери ашылган, олардынъ эдаплык эм ден савлыгы сакланган шынты гражданлары оьсетаган йылы уьй деген статусы саклаягына сенемен, – деп белгиледи 50 йыл бойы мектебте баслангыш класслар окытувшысы болып куллык эткен Эртувган Амангулова.
Шара кавыфсызлыгын савлай ортак билимлендируьв эм мектебке дейим ошакларында ОМВД Тарумов районы бойынша куллыкшылары канагатладылар.
Солай болып, олар ман янъы окув йылына аьзирлик коьрилуьв заманында да кавыфсызлык канагатлав бойынша алдын шалув шаралары озгарылган эдилер.
Суьвретте: шарадан коьринис.