Ногай районы бойынша хатын-кызлар уьшин медреседе «Марьям» деп аталган клубы аьрекетлейди. Сол клуб ишинде балалар уьшин яратувшылык студиясы да оьз куллыгын бардырады. Оьткен юмадынъ сонъгы куьнинде яратувшылык студиясынынъ етекшиси Ашувхан Сартаева, он бармагы – он алтын кыскаяклы, Савлайдуныялык бала куьнине рас барып, «Оьз атынъды араб тилинде яз» деген мастер-класс озгарды. Шарага келген йырмага ювык кызлардынъ аьр бириси туьрли туьсли ярасык таслар ман оьзлерининъ атларын яздылар.

Шарада катнаскан аьр бир бала оьзининъ эткен ярасык суьвретин, суьйиниши койынына сыймай, уьйине алып кайтты. Балалардынъ коллары ман, Ашувхан Сартаевадынъ етекшилеви мен ясалган суьвретлер бир-бирисиннен ярасык эди. Сол мастер-класста ясалган асар сонда болган аьр бир баладынъ уьйинде илинмеге орын тапканына шек йок.
Бу яратувшылык студиясы аьрекет этуьвининъ бас мырады – оьсип келетаган балаларды туьрли гаджетлерден айырув эм бар оьнерлерин ашыклав.
Биревге де ясыртын тувыл, аьли бизим балалар коьп козгалмайдылар, оларда кырда ойын, бир-бириси мен коьрисип, хабарласувлар юритуьв айлак сийрек болады, неге десе олар виртуальный яшавга коьп заман йибередилер. А сондай студиялар оларга аьвликпеге амал береди эм катнаслыкты да, солар аркалы, куьшейтпеге болады.
Биз йогарыда айтатаган яратувшылык студиясынынъ етекшиси Ашувхан Сартаевадынъ оьнери айлак кенъ. Ол оьз колы ман кайдай ярасыклыкты да аьзирлеп болады. Онынъ куллыкларын яде оьзинъизди кызыксындыратаган соравларынъызды Инстаграм социаллык тармагында, Ashura_mari бетинде бермеге боласыз. Бу куьнди сол шарада катнаскан балалар баьриси де йогары коьнъил мен эслеринде саклаяклар эм соны ман эндиги йолыгыска дейим аманластылар.
Г.Сагиндикова.
Суьвретте: мастер-класс катнасувшылары колларында оьз куллыклары ман.