Астрахань областининъ Растопуловка авылынынъ сыйлы яшавшысы Базира Капаровна Акмамбетова бу куьнлерде оьз мерекесин белгилейди. Ол – белсен яшав ой-карасы бар, яратувшылык аьрекети мен каьрлевши аьдем. Алдын ол муниципаллык маданият учреждение директоры, яратувшылык ягыннан йогары бийикликлерге етискен, суьйикли ногай яратувшылык коллективи болган «Дослык» ансамблин етекшилеген. Буьгуьнде Базира Капаровна ерли сакатлар советининъ председатели болып, «Баракъат» ямагатын етекшилейди.
Буьгуьнде карагаш ногайларынынъ «Дослык» фольклор-этнографиялык ансамбли, аьдемлерге суьйинишли такыйкалар савкатлап эм оларды халк йырынынъ, халк аьдет-йорыкларынынъ негизлерине кайтарып, белсен яратувшылык аьрекети мен каьрлейдилер. Бу бир заман Базира етекшилеген шынты халк ансамблинде халк артистлерининъ уьшинши несили йыр йырлав усталыгына уьйренеди.
Бизим мерекешидинъ аркасы ман ансамбль катнасувшылары – энтузиастлар, оьз халкынынъ шынты патриотлары, табиат пан берилген оьнерге, ясуьйкенлер несили йыйылган фольклорга таянып, Астрахань область ногайларынынъ тарихин эм маданиятын, аьдет-йорыкларын саклайды эм армаганда оьрлендиреди. Оларды тек йырлап эм бийип уьйретип калмай, Базира Капаровна аьли де сакланган маданият белгилериннен халк анъ произведениелерди, аьдет-йорыкларды, байрамларды кайтадан тургызбага уьйреткен. Эм бу баьри зат тек сценада коьрсетилип калмайды, баскаларга да коьшириледи. Район, область, савлайроссиялык эм халклар ара оьлшемли фестивальлердинъ катнасувшысы болып, «Дослык» ансамбли ерли йыр йырлав аьдет-йорыкларды, аьдетли байрам кийимлерди аявлап саклайды.
ЦНК «Эдиге» АРМОО Базира Капаровна Акмамбетовады сыйлы мереке куьни мен ак юректен кутлайды.
Биз сизди куьш-куватлыгы эм яратувшылык оьнерлиги бар аьдем экенин билемиз. Оьз исинъизге алаллык, яратувшылык аьрекетинъизде бийик уьстинликлер сизди зейинли етекши экенинъизди белгилейди. Ак юректен сизге берк ден савлыкты, наьсипти эм узак йыллар бойы яратувшылык оты соьнмегенди йораймыз. Суьйиниш, наьсип сизге эм сизинъ ювыкларга!
И.Альмухамедов,
ЦНК «Эдиге» АРМОО президенти.
