Янъыларда Кумлы авыл маданият уьйинде «село Кумли» МО администрация аькимбасы Сакинат Магомедовна Елманбетовадынъ яклавы ман яратувшылык кешлиги озгарылды. Ол халкымыздынъ айтылган зейинли шаири Мурат Алибекович Авезовтынъ 70 йыллык мерекесининъ сыйына багысланып оьтти. Конак эсабында бу яратувшылык кешлигинде шаиримиз касында район маданият тармагынынъ куллыкшылары Н.Халилова, С.Курпаева бар эдилер. Шара коьлем аьдемлер катнасувы ман озгарылды: онда ерли мектеб, балалар бавынынъ куллыкшылар коллективлери, социаллык куллыкшылар эм авыл яшавшылар ваькиллери ортакшыладылар.
Кешлик бек кызыклы аьлде озгарылды: ерли маданият уьйининъ куллыкшылары, авыл эм мектеб китапханалар заведующийлери Рабият Менлиалиева эм Салимет Насырова шарага келисли кепте кепледилер маданият уьйининъ залын: коьз алдында – шаирдинъ китаплер выставкасы, халкымыздынъ аьвелгиден алып кулланылатаган уьйшилик савыт-садаклары. Солай ок шаир Мурат Авезовтынъ яшавы эм яратувшылыгы акында слайдлар да аьзирленген эдилер.
Колларында туьрли туьсли шарлары ман тизилисип йолыктылар ногай шаирин ерли мектеб окувшылары.
Шарады 2-нши класс окувшылары (класс етекшиси Лиза Кусеповна Картакаева) аштылар: олар шаирдинъ «Масаклар» йыйынтыгыннан ятлавлар айтып эситтирдилер, педагогикалык исининъ ветеранлары Хадижат Бурумбаева шаирдинъ «Аманат» деген поэмасынынъ бир уьзигин, Сафият Мамбетовна Аджигельдиева, Сакинат Магомедовна Елманбетова шаирдинъ ятлавларын окыдылар, авылдынъ белсен ямагат аьрекетшиси Шора Мамуров шаир Мурат Авезовтынъ йырларга айланган ятлавлары аз тувыл экенин шайытлады сценага шыгып йырлавы ман. Мектеб окувшылары Зейнап Умарова, Алтынай Менлиалиева, Рустам Аджигельдиев, Хадия Нурлубаева эм баскалар да шаирдинъ ятлав сыдыраларын яттан окыдылар. 8-нши класс окувшылары язувшыдынъ «Намыс» деген шыгармасы бойынша салынган сценкаларында ойнавы ман, 9-ншы класс окувшылары биюви мен оьзлерининъ артистлик оьнерлерин коьрсеттилер.
Сыйлы мерекешиди собес куллыкшысы Асиет Болатова, окытувшы Лиза Кусеповна Картакаева эм балалар бавынынъ тербиялавшысы Камиля Кулушева кутладылар эм ога оьз савкатларын тапшырдылар.
Кешликтинъ сонъында соьз Мурат Авезовка берилди. Ол Кумлы авылында ога сондай сый-оьрмет этип, йылы йолыкканлары уьшин уьйкен разылыгын билдирди.
Б.Ибрагимова.
Суьвретте: шарадан коьринис.
