Дагестаннынъ Ногай район администрациясынынъ билдируьвине коьре, Шешен Республикасынынъ Ямагат Палатасынынъ председатели, Шешен Республикасындагы регионаллык ямагат организациясы болган ногайлардынъ миллет-маданият автономиясынынъ председатели Аля Курганова «Лидеры НКО ЧР» деген регионаллык ярысынынъ «Лидер патриот» деген номинациясы бойынша енъуьвшиси болып шыкты.

Биринши дережели лауреат дипломын Аля Кургановага Шешен Республикасынынъ Аькимбасынынъ коьмекшиси Тимур Алиев тапшырды. Савга тапшырылувы Шешен патшалык университетиндеги «Точка кипения» деген майданында Шешен Республикасынынъ Аькимбасынынъ грантына «Гражданское признание» проекти бойынша уйгынланган эди.
Шарада сыйлы конаклар эсабында Шешен Республикасынынъ Аькимбасынынъ гражданлык ямагатынынъ оьрленуьви эм аьдемлер ыхтыярлары бойынша Советининъ председатели Тимур Алиев, ерли Парламентининъ депутаты Аднан Нагаев, Шешен Республикасынынъ профсоюзлар советининъ председатели Хусейн Солтагереев шыгып соьйледилер.
Шешен Республикасынынъ Оькиметининъ эм Аькимбасы администрациясынынъ ямагат эм дин организациялары ман биргелесуьви бойынша департаментининъ аьрекетлеви мен «Сообщество будущего» деген яслар баславларынынъ ассоциациясы шарадынъ уйгынлавшысы болды.
Суьвретте: Аля Кургановага савга тапшырув мезгили.