Янъыларда Тарумов районынынъ Тарумовка авыл орта мектебинде ДЮСШ, орта билимлендируьв мектеблерининъ окувшылары, 2007-нши йылдынъ эм оннан да яс оьспирлердинъ арасында волейбол бойынша муниципалитет бириншилиги уйгынланып оьтти.

Тарумов район ДЮСШ етекшисининъ орынбасары З.Рамазановтынъ белгилевине коьре, ярыс тамамлары бойынша 1- нши орынга Ногай районынынъ Терекли-Мектеб авылынынъ тренери А. Култаевтинъ етекшилиги астында ДЮСШ командасы тийисли болды. Экинши орынды О.Магомедгаджиевтинъ етекшилеви мен Бабаюрт авыл ДЮСШ командасы алды. 3-нши орынды Тарумов районынынъ А-Невская станицасынынъ орта мектебининъ тренери И.Маллаевтинъ етекшилеви астында командасы бийледи.
Енъуьвши командага 1-нши дережели дипломы эм кубок, а ойнавшыларга болса, медальлер эм биринши дережели Сый грамоталар тапшырылдылар. 2-нши эм 3- нши орынларына тийисли этилген командалары дипломлар ман эм баалы савгалар ман, а ойнавшылар медальлер эм Сый грамоталар ман белгилендилер. Ийги ойнавшыларга да номинациялар бойынша Сый грамоталары берилдилер.
Савгаларды эм ярыстынъ савлай озгарылувы Тарумов районынынъ ДЮСШ ман уйгынланып аьзирленген эди.
Соьйтип, спорттынъ волейбол ойыны бойынша ярысы кызыклы эм йогары коьнъилде оьтти.
Суьвретте: волейбол катнасувшылары.