Терроризм – XXI оьмирдинъ энъ де кавыфлы эм уьйкен эс берип карагандай баьлеси болады. Коьплеген аьдемлердинъ бактысында да, оькинишке, орын тапкан ерлер сийрек тувыл, йыйы да расады. Коьз алдымызда уьзилген яшав оьмирлер…
Терроризм – бу соьз бизим яшавымызга киргенли коьп заманлар оьтпеген, бир отыз йыл артка кайтып карасак, сонынъ маьнесин де коьплер анъламайтаган болган, аьлиги заманда сол соьз бизим балалар бавларына юретаган балаларга да айлак куьшли анъламлы болмаса да, таныс, неге десе сога карсы профилактикалык ислер, туьрли шаралар кайсы билимлендируьв учреждениесинде де оьткериледи.
Терроризмге карсы оьткерилетаган аьр бир шарадынъ бас мырады – яслар арасында терроризм эм экстремизм идеологиясына карсы турув гражданлык позицияды кеплев эм ясларга анъ-тербия баалыкларын коьрсетип, олар араларында соны кенъ яйылдырув болады.
Дагестан Республикасында, савлай Россия Федерациясынынъ туьрли регионларындагындай болып, йыл сайын «Яслар терроризмге карсы» деп аталган фестивали оьткериледи.
Аьлиги заманнынъ саниятлар фестивалин йыл сайын Дагестан Республикасынынъ М.Горький атындагы орыс патшалык драма театры уйгынлап озгарады. Бу шара бойынша эртеректен белгиленген тоьре агзалары бир неше номинациялар бойынша яслардынъ оьнерлерин карайдылар.
2022-нши йылда, Дагестан Республикасы бойынша болып озган «Яслар терроризмге карсы» фестивалинде Ногай районымыздынъ К.Кидир- ниязов атындагы Карагас авыл орта мектебининъ 10-ншы класс окувшысы Амина Курманали кызы Ильясова енъуьвши болган.
Амина, окытувшыларынынъ билдируьвлерине коьре, бек нызамлы эм билимли окувшы. Касиетине коьре, оьзи бек каьмбил кызалак. Ол бу куьнлерде 10-ншы класс окувшысы болып, коьп етимислерге етисип келеди. Ол мектеб яшавында да бек белсен катнасады. Аминадынъ яратувшылык яктан оьрленуьви коьплерди сукландырады. Ол «Тулпар» кружогынынъ агзасы болып, Карашай-Шеркеш еринде баспаланып шыгатаган «Маьметекей», Дагестан Республикасында дуныя ярыгын коьретаган «Орленок» журналларынынъ бетлеринде, оьз каьлемин сынап, ятлавларын баспалаган. Ызгы заманларда оьзининъ куьшин кара соьз жанрында да сынап карайды.
Дагестан Республикасында аьдетке кирген шарада Амина Ильясова Муса Джалильдинъ «Варварство» деген шыгармасыннан уьзикти сахнага шыгып окып, биринши орынга тийисли болганы акында хабарга биз бек суьйиндик. Балаларымыздынъ сондай енъуьвлери бизге уьйкен куьез болады.
Алдыда биз Аминага енъуьвлерди эм кайсы катнаскан шарада да тек, бу куьн алгандай, биринши дережели диплом алгандай куьнлерди йораймыз.
Дайым йолынъ ашык болсын, Амина!
Г.Курганова.
Суьвретте: Амина Ильясова окытувшысы Марина Кидирниязова ман.