Яслар куьни, тамбыз айынынъ 27-нде Ногай районынынъ яс несили РФ Конституциясына туьрленислер киргистуьв бойынша тавыс беруьвде оьзининъ гражданлык ой-токтасын белсенли билдирдилер. Сол куьн олар Орта-Тоьбе, Кумлы, Терекли-Мектеб, Нариман эм Куьнбатар авылларындагы сайлав участокларына келгенлер.

Пятигорск каласынынъ фармацевт колледжининъ 3-нши курсынынъ студенти Асия Ганиевадынъ соьзлери мен, Россиядынъ Асыл Законына туьрленислер киргистуьвди коьтергишлев – патшалыктынъ ясларга эткен уьйкен сеними.

–Бизге, ясларга элимиз Коституцияга туьрленислер киргистуьв бойынша тавыс бермеге сеним эткен. Биз сайлав участокларына келип, оьз тавысларымызды бермеге керекпиз деп санайман. Конституцияга туьрленислер аьдемлердинъ яшавын ийгилендируьв, патшалык туьзилисин беркитуьв эм гражданларды социаллык яктан коьтергишлев уьшин киргистиледилер.

Мага бек ярады айванларга аявлап карав акында туьзетуьв (114-нши Статья «Россия Федерациясынынъ патшалыгы: ямагатта айванларга аявлап каравды кепленидируьвге амаллар яшавга шыгарады — редакция). Айванларды аявдан басланады яслардынъ эдаплык яктан тербиясы. Оларды суьймеген аьдем, баска табиат дуныясын суьйип болмайды» -деди Асия Ганиева «Шоьл тавысы» республикалык газетасынынъ корреспондентине.

Студент кыз айтканлай, Куьнбатардынъ авыл администрациясыныныъ меканында орынласкан 1185-нши номерли сайлав участогында халктынъ савлыгын кавыфсызландырув уьшин баьри амаллар да кулланылган. Айырым столларга бир кере куллатылатаган маскалар, колгаплар, калемлер, антисептиклер салынган.

Куьнбатар авылы ногай кийиз басув усталыгын бу куьнлерге дейим саклаганы уьшин савлай тюрк дуныясына белгили, солай ок бу авылда ногай халкынынъ акыны –Алибий Романов тувган.