Савлай республика бойынша «Спутник V» препараты ман вакцинация озгарылады. Ногай район орталык больницасында 200 артык аьдем вакцинация оьткен. Навруз айынынъ 29-ншы куьнинде районга вакцина аькелинди. Биринши болып коронавирустан вакцинацияды ясуьйкенлер оьтип басладылар. Солардынъ ишинде – «Шоьл тавысы» республикалык газетасынынъ яваплы секретари Любовь Уразаева эм корректоры Азинет Башиева.

Терапевт Сафира Аджиева вакцинация алдында оларды карады, керекли документлерди толтырган сонъ, мед- сестралар Джамиля Манкаева эм Наталья Яхьяева ийне суктылар. Вакцинация алган ясуьйкенлеримиздинъ аьли аьруьв. Дагестан Республикасынынъ ат казанган маданият куллыкшысы, Россия Федерациясынынъ Журналистлер союзынынъ агзасы Любовь Уразаева ясуьйкенлер атыннан медицина куллыкшыларга разылык соьзин айтты.
– Мен коронавирус пан авырганман, мен билемен, кайдай бу мараз авыр оьтеди. Мен район яшавшыларын вакцинация оьтпеге шакыраман. Соьйтип биз оьзимизди, ювыкларымызды яман мараздан саклармыз, – деди ол.
Район яшавшылары вакцинацияды оьтедилер.
Бизим хабаршы.
Суьвретте: Л.Уразаева вакцинация алув мезгилинде.