Быйыл оьткен айдынъ ызгы куьнлеринде Ставрополь каласында «Аренада куьресуьв» деп аталган эркин куьрес бойынша Савлайроссиялык турнир болып озган.
Бу кызыклы ярысларда Дагестан, Кабарты-Балкар, Шешен, Ингуш, Калмык республикаларыннан, Краснодар, Ставрополь крайларыннан эм Россиядынъ баска регионларыннан 500-ге ювык яс спортсменлер катнастылар. Солардынъ ишинде Ногай районынынъ Балалар-яслар спорт мектебининъ окувшылары да ортакшылык эттилер.
Турнирдинъ сырагысында бизим яс куьресуьвшилер: А.Азимов, Д.Тангатаров, М.Кидирниязов – алтын; И.Наврузов, К.Батыров – куьмис эм Н.Кульчимаев, С.Кульчимаев, А.Джумакаев эм М.Курманалиев ез медальлерди казандылар.
Бу яс спортсменлерди Терекли-Мектеб авылдынъ 2-нши номерли Балалар-оьспир спорт мектебининъ тренер-окытувшысы Азамат Кокоев эркин куьрестинъ сулыбына уьйретеди. Онынъ тербияланувшылары солай ок быйыл август айында Россияда яшайтаган ногайлар арасында оьткерилген «Шоьл баьтирлери» турниринде белсенли катнастылар. Сонда, айтпага, Казмухамед Аблезов 1-нши орынды алып енъуьвши болган.
Азамат Кокоевтинъ яс спортсменлери Дагестанда, Кабарты-Балкар, Карашай-Шеркеш республикаларында, Ставрополь крайында болып озатаган коьп турнирлерде ортакшылык этедилер эм баргылы орынларды аладылар.
М.Юнусов.
Суьвретте: Ставропольде енъуьвши болган Ногай районынынъ яс куьресуьвшилери.