Янъы окув йылы алдында аьдет бойынша окытувшылар конференциясы озгарылады. Сол аьдетке коьре, янъыларда «Ногайский район» МР администрациясында окытувшылар йыйылдылар. Йыйынды «Ногайский район» МР администрациясынынъ аькимбасы Мухтарбий Аджеков ашты. Ол окытувшыларды йылы хошлап, келеяткан янъы окув йылы ман кутлады. Мухтарбий Аджеков Батыр-Мурза, Терекли-Мектеб, Кумлы эм Шуьмлелик авылларында айлак коьп заман оьтпей, янъы мектеблер, солай ок баска авылларда янъы балалар бавлары эм спорт майданлар салынувыннан тура ийги хабар айтты. Сонъ Ногай район билимлендируьв боьлигининъ етекшиси Алтын Агаспарова «Муниципаллык тармагынынъ абырайлы барыслары: билимлендируьвдинъ эм тербиялавдынъ сапаты, яс зейинлерди айырув эм коьтергишлев» деген докладын йыйылганларга окып эситтирди.
Сонда районымыздынъ окытувшыларынынъ эм окувшыларынынъ республикалык кезегинде оьткен конкурсларда енъуьвлери, йылдан-йылга ЕГЭ сынавларын йогары балларга озган окувшылардынъ саны оьсуьви, сол сырагыга етисуьв йоллары акында айтылды. Элбетте, бизде зейинли, билимли балалар аз тувыл. Оларды сол уьстинлик сокпагына салган айтылган окытувшыларга да разылык билдирилди. Солай ок А.Агаспарова маьселелер акында да айтып озды, сонынъ сырасында районымыздынъ мектеблеринде туьрли сабакларыннан окытувшылардынъ керек болувы. Оннан сонъ А.Джанибеков атындагы мектебининъ тербиялав иси бойынша етекшидинъ орынбасары Эльмира Суюндикова «Билимлендируьв исине тербиялавдынъ ис программаларын киргистуьв», «Ногай Эл» балалар бавынынъ етекшиси Наида Юнусова «Билимлендируьвдинъ мектебке дейим басамагында зейинли балаларды аянлав амаллары», экинши номерли балалар эм яслар спорт мектебининъ етекшиси Камиль Бекмурзаев «Спорт яктан талаплы балалар ман исинде косымша билимлендируьвдинъ окытувшысынынъ кеспилик аьзирлиги» деген докладларын окып эситтирдилер.
Бек коьп ийги эм оьктемситкен соьзлер айтылды бу куьнги йыйында ногай яс спортсменлери акында. Олар баска узак якларда туьрли тренерлердинъ иси эм коьмеги аркалы бийик етимислерге етсе де, спортка олардынъ юрегинде суьйимди эм негизди Ногай районынынъ спорт мектеблерининъ окытувшылары кондырганлар эм салганлар.
Озган 2020-ншы йыл Савлайроссиялык билимлендируьв профсоюзына мерекели йыл болды. 30 йылдан бери профсоюз педагогика исининъ куллыкшыларынынъ ыхтыярларын коршалап келеди. Окытувшыларга мерекели медальлерди Ногай районы бойынша профсоюз организациясынынъ председатели Насипхан Джумаева тапшырды.
Окытувшылар конференциясында кабыл этилинген резолюцияды Нариман авыл мектебининъ етекшиси Д.Эсиргепов окыды.
Йогарыда айтылганлай, бу куьнги йыйында билимлендируьв исинде уьстинликлерге етискен окытувшылар эм балалар бавларынынъ тербиялавшылары белгилендилер. Оларга «Ногайский район» МР администрациясыннан Сый грамоталар тапшырылды. Солай ок айырым етимислери эм ЕГЭ оькимет сынавларын йогары балларга толтырган окувшыларды аьзирлеген окытувшылар «ДР билимлендируьв тармагынынъ алдышысы» деген коькирек белгиси мен савгаланаягы да билдирилди. Олар – педагогикалык исининъ ветераны Таймасхан Акболатов, Марие Авезова, Эльмира Аубекерова, Нафисат Ярлыкапова, Беризат Кулушова, Тамара Кулаева, Нафисат Эрежепова, Гульмира Тангатарова, Оразган Нурганова. «ДР ат казанган окытувшысы» деген сыйлы атты казанган Йолмамбет Шандавов айырым белгиленди.
Бу савгалар, солай ок окувшыларымыз эм окытувшыларымыздынъ уьстинликлери Ногай районы республикасымызда билимлендируьв бойынша алды орынлардынъ бирисинде экенин анълатады. Ол, соьзсиз, уьйкен куьез. Тек шалысып ислевди коймай, алдыга эм аьли де алдыга карап талап этилсин!
Н.Кожаева.
Суьвретлерде: окытувшылар конференциясыннан коьринислер.
