Дагестан Аькимбасы Сергей Меликов аьрекетининъ бас приоритетли йолы – балалар акында каьр шегуьв, берк ден савлыгы болган яс несилди тербиялав.

Сол акта республика еринде коьп куллыклар юритиледи, объектлердинъ курылысы дайым да регион етекшисининъ тергеви астында турады. Сол борышты яшавга шыгарувда тувган маьселелерге ДР Аькимбасы ягыннан уьйкен эс каратылады. Онынъ белгилеви мен, республика еринде кишкей саьбийлер уьшин яслилер, балалар бавлары эм мектеблер курылыслары планланган.
Янъыларда ДР баспа эм информация Министерствосы ман озгарылган «Янъы цифровой аьллеринде региональли коьлем информационлык амалларынынъ аьрекети» Медия форумдагы пресс-конференция барысында Дагестан Аькимбасы Сергей Меликовтынъ айтувына коьре, республика еринде 2022-нши йылдынъ экинши кварталына онлаган балалар бавлары эм мектеблери кулланувга берилеек.
Эндиги йылдынъ январь айында власть пен келеекте салынмага планланатаган билимлендируьв учреждениелердинъ аян саны белгиленеек, капиталлык ремонт этуьв уьшин учреждениелер саны кепленеди.
Бу баьри борышлар Дагестан Аькимбасынынъ тергеви астына алынган. Власть органлары ягыннан бизим балаларымыздынъ эм уныкларымыздынъ келеектегиси акында каьр шегуьви регионнынъ социаллык эм билимлендируьв яктан оьрленуьви уьшин бек маьнели. Белгилев керек, келеектеги йылды Сергей Меликов оьз Указы ман «Билим йылы» деп тостастырган: билим учреждениелерге, балалар бавларынынъ тербияланувшыларына, окувшыларга, окытувшыларга, студентлерге айырым эс каратылаяк.
Л.УРАЗАЕВА.