Уьстимиздеги йылдынъ сары тамбыз айынынъ 21-нши куьнинде Карашай-Шеркеш Республикасында олимпиада чемпионы Альберт Батыргазиевти шатлыклы аьлде йолыктылар. Чемпион ман келген делегациясын Карашай-Шеркеш Республикасынынъ, районнынъ межесинде шатлыклы аьлде хош коьрип алдылар. Оннан сонъ олимпиада енъуьвшисин Ногай районында шатлыклы аьлде регион властьлерининъ ваькиллери, айтпага, КЧР Оькиметининъ Председателининъ орынбасары Д.Суюнов, Ногай район администрациясынынъ аькимбасы М.Хапиштов, Ногай районынынъ аькимбасы Р.Кукаев, Карашай-Шеркеш Республикасынынъ коммуникация эм миллетлер ислери бойынша министри А.Кумуков, СКФО бойынша Россия мусылманларынынъ дин управлениесининъ аькимбасынынъ толы ыхтыярлы ваькили Р.Акказиев, спортсменлер, ямагат аьрекетшилери эм ерли яшавшылары йолыктылар. Конакларга деп ерли артистлерининъ ортакшылык этуьви мен концерт те уйгынланып коьрсетилди, солай болып, келген сыйлы конакларга деп, ногай халкынынъ миллет аслары да аьзирленген эдилер.

– Мен сизинъ аьр кайсынъызды хош коьремен. Йолыгыста саьбийлердинъ коьп болувы да мени бек суьйиндиреди. Ясларымыз – ол бизим келеектегимиз, сол ясларымызга ийги коьрим болмага шалысып келермиз. Мен де оьзимнен уьйкен йолдасларым ман тенъ болмага, олардан коьрим алмага дайым шалысып келемен. Оьз ата-ананъызды баалап билинъиз. Олар бизге алдымызга мыратларымызды салмага эм оларды яшавга шыгармага, сол мыратларга етиспеге демевлик болып келедилер, – деди йолыгыска йыйылганлардынъ алдында оьз ойлары ман боьлисип, ногай яс, биринши олимпиада чемпионы Альберт Батыргазиев.
Токио каласында оьткен бокс бойынша олимпиада енъуьвшиси Карашай-Шеркеш Республикасынынъ аькимбасы Р.Темрезов пан (суьвретте) да йолыгысты.
Соьйтип чемпион ман йолыгыска келген аьр бир ногайдынъ юрегинде енъуьвши ногай яс уьшин оьктемлик, уьйкен суьйиниш тувдырды.
Суьвретлерде: шарадан коьринислер.