Янъыларда Дагестаннынъ Аькимбасынынъ кесек заманга куллыгын юритуьвши Сергей Меликов ис йорыгы бойынша Кизляр районында конакта болып кетти. Бас деп ол Крайновка авылында «Золотые Дюны» деген турист-реакционлык комплексининъ проекти кайтип яшавга шыгарылып барувы ман танысты.
Крайновка авылында проект бойынша аьел тыншаювы эм балалар уьшин савландырув туризми бойынша курылысы басланган. Комплексте 200 орынлы конак уьйи, 35 орынлы VIP- конак уьйи, клуб, аквапарк пан спорт комплекси, волейбол эм теннис майданлары,120 орынлы 6 коттеджлери, автостоянкалары киргенлер. Курылыс куллыклары 2017- нши йылда авыр финанс аьлиннен тура токтатылган болган. Аьлиги заманда курылыс кайтадан басланган. Проекттинъ яшавга шыгарылувы ман 150 янъы ис орынлары шыгаяклар. Проектти баславшылары регион етекшиси мен туристлик комплексининъ инфраструктурасы бойынша кенъестилер.
Сергей Меликов профильли ведомстволарына исти тезлетпеге эм курылыска инвесторларды аьвликтирмеге борыш берди. Дагестан Аькимбасынынъ ойына коьре бу проект Крайновка авыл яшавшылары уьшин коьтерилуьв, оьсуьв амалы болаяк, туристлердинъ келип баславы ман авыл оьрленмеге болаяк. Республика Аькимбасы оьз ис йорыгы бойынша Кизляр районында болувы ман Кизляр пышаклардынъ ясалувы, йыныслы кызыл балыктынъ асыллавы акында билди.
Оннан сонъ Меликов ерли яшавшылар ман йолыгысты. Олар авылда газ эм сув йогы акында маьселелерин айттылар. Регион етекшиси оларга 2022- нши йылга дейим сол маьселеди шешпеге соьз берди. Оннан сонъ республика аькимбасы ис йорыгы бойынша Бабаюрт районында конакта болып кетти. Бас деп ол Бабаюрт авылында социаллык объектлерин карап шыкты. Олардынъ экеви – 330 орынлы балалар бавы эм 1176 орынлы мектеби 1980- нши йылдан алып курылып баслаганлар. Дагестан Аькимбасынынъ кесек заманга куллыгын юритуьвши, еринде аьл мен таныскан сонъ, ДР Экономикасынынъ оьрленуьв министерствосына баска профильли ведомстволары ман биргелес, республика бойынша инвестициялык программасы бойынша, балалар бавы курылысынынъ соравын карамага тапшырды. Сергей Меликов келеек йылда курылысты басламага тапшырды, солай болып куллыклар сапатлы этилгенин эм балалар бавы ийги канагатланганын белгиледи.
